Jyl sońynda ınflıatsııa 13-15% deńgeıinde bolady – Ulttyq bank
2022 jylǵy 16 maýsym 11:50

Jyl sońynda ınflıatsııa 13-15% deńgeıinde bolady – Ulttyq bank

NUR-SULTAN. QazAqparat – Ulttyq bank 2022 jyldyń sońynda ınflıatsııanyń 13-15% deńgeıinde bolatynyn boljady. Bul týraly qarjy retteýshi uıymnyń tóraǵasy Ǵalymjan Pirmatov aıtty, dep habarlaıdy QazAqparat tilshisi.

Aıta keteıik, Senatta «2021 jylǵy respýblıkalyq bıýdjetti oryndaý týraly» QR Úkimetiniń jáne respýblıkalyq bıýdjettiń atqarylýyn baqylaý jónindegi esep komıtetiniń baıandamalary tyńdalyp jatyr.

«Bıylǵy ınflıatsııalyq qysym geosaıası daǵdarys bastalýynan kúsheıdi, odan keıin aqpan-naýryzda teńgeniń aıyrbastaý baǵamynyń álsireýi jáne joǵary belgisizdiktiń saldarynan shamadan tys ósken tutynýshylyq belsendilik baıqaldy. Onyń saldarynan ınflıatsııa aqpandaǵy 8,7%-dan mamyrda 14%-ǵa deıin ósti. Jyldyq mánde 19%-ǵa jetken azyq-túlik ónimderi baǵasynyń ósýi de birshama úles qosyp keledi», - dedi Ulttyq bank tóraǵasy Senattyń jalpy otyrysynda.

Onyń aıtýynsha, syrtqy ınflıatsııalyq jaǵdaı azyq-túlikke jatpaıtyn taýarlar baǵasynyń artýyna qysym kórsetýde, olardyń ósýi 11,9%-ǵa deıin jedeldedi.

Retteletin qyzmet baǵasyn ósirýge engizilgen moratorııdiń tejeýish áserine qaramastan, aqyly qyzmet ınflıatsııasy 9,1%-ǵa deıin ósti.

«Syrtqy sektorda geosaıası ahýaldyń edáýir nasharlaýynan syrtqy shoktyń el ekonomıkasyna saldaryn barynsha azaıtý, baǵa turaqtylyǵyn saqtaý jáne jergilikti valıýtadaǵy aktıvterdi qorǵaý maqsatynda Ulttyq bank 2022 jylǵy 24 aqpanda bazalyq mólsherlemeni 13,5%-ǵa deıin kóterdi. Úkimetpen birlesip, jeke tulǵalardyń teńgedegi depozıtteri boıynsha ótemaqyny bıýdjet qarajaty esebinen tóleýdi kózdeıtin Teńgelik salymdardy qorǵaý baǵdarlamasy jarııalandy. Údemeli syrtqy ınflıatsııalyq qysym, jalǵasyp kele jatqan yntalandyrýshy fıskaldyq saıasat, turaqty ishki jáne syrtqy suranys, ınflıatsııalyq boljamdardyń ósýinen 25 sáýirde bazalyq mólsherleme 14%-ǵa deıin kóterildi», - dedi Ǵ. Pirmatov.

Sonymen qatar Ulttyq bank aıyrbas baǵamynyń kúrt aýytqýyn jáne onyń ınflıatsııaǵa aýysýyn shekteý sharalaryn qabyldaǵan.

Nátıjesinde aıyrbas baǵamy kúrt aýytqýdan keıin ótken jyldyń sońyndaǵy deńgeıge qaıta oraldy.

«Osy áreketterdiń nátıjesinde dollarlanýdyń ósý táýekelderi azaıyp, qarjy júıesi syrtqy shoktarǵa tótep bere aldy. Inflıatsııaǵa qarsy saıasatty kúsheıtý úshin Úkimet jergilikti atqarýshy organdarmen birlesip, 2022-2024 jyldarǵa arnalǵan jańartylǵan Inflıatsııa deńgeıin baqylaý jáne tómendetý jónindegi sharalar keshenin júrgizip jatyr. Qysqa merzimdi jáne orta merzimdi perspektıvadaǵy ınflıatsııa syn-qaterleriniń qazirgi balansy men jańartylǵan boljamdardy eskere otyryp, Ulttyq bank bıylǵy 6 maýsymda bazalyq mólsherlemeni 14% deńgeıinde saqtaý týraly sheshim qabyldady. Ulttyq bank 2022 jyldyń sońynda ınflıatsııanyń 13-15% deńgeıinde bolatynyn boljap otyr. Boljam Úkimettiń ınflıatsııa deńgeıin baqylaý jáne tómendetý jónindegi sharalar keshenin iske asyrýyn eskere otyryp jasaldy», - dedi Ǵalymjan Pirmatov.


Seriktester jańalyqtary

Jańalyqtar

Úrdis

MURAǴAT