Jańalyqtar  >

Jyl saıyn turmystyq zorlyq-zombylyq boıynsha 100 myńnan astam ótinish túsedi - ІІM

2022 jylǵy 30 qyrkúıek, 16:48
Jyl saıyn turmystyq zorlyq-zombylyq boıynsha 100 myńnan astam ótinish túsedi - ІІM

ASTANA. QazAqparat - QR Premer-Mınıstri Álıhan Smaıylovtyń tóraǵalyǵymen ótken quqyq buzýshylyqtardyń aldyn alý jónindegi vedomstvoaralyq komıssııanyń otyrysy ótti. Onda otbasylyq-turmystyq zorlyq-zombylyqtyń aldyn alý sharalaryn kúsheıtý jáne qaýipsizdikti qamtamasyz etýdiń servıstik modelin engizý máseleleri qaraldy, dep habarlaıdy QazAqparat Úkimettiń baspasóz qyzmetine silteme jasap.

Іshki ister mınıstriniń birinshi orynbasary Marat Qojaev polıtsııaǵa jyl saıyn turmystyq zorlyq-zombylyq faktileri boıynsha 100 myńnan astam ótinish kelip túsetinin baıandady. Bul rette jaǵdaılardyń 60%-ynda jábirlenýshiler quqyq buzýshylarǵa qatysty sharalar qabyldaýdan bas tartady. 2022 jyly 37 myń adam ákimshilik jaýapkershilikke tartyldy. Bul rette otbasylyq-turmystyq qatynastar salasyndaǵy qylmystyq quqyq buzýshylyqtar sany 7%-ǵa (623-ten 583-ke deıin) tómendedi.


Memleket basshysynyń tapsyrmasy boıynsha ІІM otbasylyq-turmystyq saladaǵy zorlyq-zombylyqtyń aldyn alý úshin jaýapkershilikti qatańdatý sharalaryn, sondaı-aq otbasynyń shyrqyn buzýshylardy ońaltý jáne olarmen tárbıe jumysyn júrgizýdi qamtıtyn qadamdardy ázirledi.

Osylaısha, bul saladaǵy is-qımyldardy úılestirý úshin ýákiletti memlekettik organdy belgileý usynylyp otyr, bul repressıvti sharalarǵa emes, azamattardyń áleýmettik-ekonomıkalyq problemalaryn, balalardy tárbıeleý jáne jalpy, otbasy mártebesin kóterý máselelerin sheshýge basymdyq berýge jol ashady.

Sonymen qatar turmystyq qylmystardy tirkeýdiń ótinish berý túrinen anyqtaý sıpatyna kóshý josparlanýda, bul polıtsııaǵa quqyq buzýshyny jábirlenýshilerdiń ótinishinsiz, ıaǵnı turmystyq zorlyq-zombylyq jasaý faktisi boıynsha jaýapqa tartýǵa múmkindik beredi. Osylaısha, jazanyń bultartpaýshylyq prıntsıpi qamtamasyz etiledi.

Budan basqa, ákimshilik qamaýǵa alýdyń eń az merzimin 5 táýlikten bastap (buryn bolmaǵan) belgileý, tergeý kezeńinde otbasynyń shyrqyn buzýshyny oqshaýlaý jáne ony sottyń qamaýǵa alý múmkindigin qarastyrý, sondaı-aq taraptardyń tek bir ret jáne sotta ǵana tatýlasýyna múmkin berý usynylýda.

Osy taqyryp boıynsha Bas prokýrordyń orynbasary Jandos Ómiralıev, eńbek jáne halyqty áleýmettik qorǵaý mınıstri Tamara Dúısenova jáne ádilet vıtse-mınıstri Alma Muqanova baıandama jasady.


Premer-Mınıstr turmystyq zorlyq-zombylyqtyń aldyn alýda jańa áleýmettik servısterdi, onyń ishinde otbasynyń tsıfrlyq kartasyn belsendi qoldaný qajettigin atap ótti.

«Tsıfrlyq tehnologııalardy jáne derekterdi taldaýdy paıdalana otyryp, qandaı da bir problemalar týyndaýy múmkin qaýipti aımaqtaǵy otbasylardy anyqtaý qajet. Qylmystardyń nemese basqa da zańsyz áreketterdiń jasalýyn kútpeı, eń aldymen, osylarǵa nazar aýdarý kerek. Quqyq buzýshylyqtyń saldarymen kúresýden góri onyń aldyn alǵan áldeqaıda durys», — dedi Premer-Mınıstr.

Onyń aıtýynsha, óńirler ákimderiniń qyzmetin baǵalaý reıtıngine turmystyq zorlyq-zombylyqtyń aldyn alý deńgeıiniń ındıkatorlaryn engizý máselesin qarastyrý, sondaı-aq daǵdarys ortalyqtarynyń tapshylyǵy máselesin sheshý jóninde sharalar qabyldaý qajet.


Іshki ister mınıstrligine otbasylyq-turmystyq saladaǵy zorlyq-zombylyq úshin jaýapkershilikti qatańdatý jónindegi zań jobasyn ázirleý sheńberinde halyqpen keńinen túsindirý jumystaryn júrgizý tapsyryldy.

Sondaı-aq VAK otyrysynda qaýipsizdikti qamtamasyz etýdiń servıstik modeline kóshý máselesi qaraldy, onyń sheńberinde azamattarǵa sapaly polıtsııa qyzmetterin kórsetýge jáne quqyqtyq tártip salasyndaǵy problemalardy birlesip anyqtaý jáne sheshý úshin memlekettik ınstıtýttardyń qoǵammen turaqty áriptestik qatynastaryn qalyptastyrýǵa basa nazar aýdarylady.

Premer-Mınıstr ІІM-ge memlekettik organdardyń osy baǵyttaǵy jumysyn tıimdi úılestirýdi qamtamasyz etýdi, al óńirlerdiń ákimdikterine jergilikti jerlerde servıstik modeldi sapaly masshtabtaý jóninde sharalar qabyldaýdy tapsyrdy.

«Bul – Memleket basshysy bastamashy bolǵan quqyq qorǵaý salasyndaǵy mańyzdy reformalardyń biri. Jyl qorytyndysy boıynsha árbir óńirdiń osy baǵyttaǵy jumysyna baǵa beriledi», — dedi Álıhan Smaıylov.

Foto: primeminister.kz





Tegı:
Seriktester jańalyqtary

Jańalyqtar