Jyl basynan beri ulttyq ekonomıka kúrdeli jaǵdaıda damyp keledi - Prezıdent

NUR-SULTAN. QazAqparat - Memleket basshysy Qasym-Jomart Toqaev Úkimettiń keńeıtilgen otyrysynda qandaı máseleler qaralatynyn aıtty, dep habarlaıdy QazAqparat.

«Búgin biz koronavırýs indetine qarsy qabyldanyp jatqan sharalarǵa qatysty máselelerdi qaraımyz. Sonymen qatar, bıylǵy birinshi jartyjyldyqtaǵy Elimizdiń áleýmettik-ekonomıkalyq damýyn qorytyndylaımyz. Jyl basynan beri ulttyq ekonomıka kúrdeli jaǵdaıda damyp keledi. El ekonomıkasy jalpy 1,8 paıyzǵa tómendedi. Pandemııaǵa baılanysty qyzmet kórsetý salasy aıtarlyqtaı quldyrady (5,6 paıyz). Halyqty jáne bıznesti qoldaý úshin asa mańyzdy sharalar qabyldadyq. Meniń tapsyrmam boıynsha Ekonomıkalyq ósimdi qaıta qalpyna keltirý jóninde keshendi jospar qabyldandy. Búgin Úkimet pen ákimderdiń ekonomıkalyq ósimdi qalpyna keltirý jáne halyqtyń ál-aýqatyn qamtamasyz etý jóninde qabyldaǵan sharalaryn talqylaımyz», - dedi Q.Toqaev kirispe sózinde.

Prezıdent Úkimettiń keńeıtilgen otyrysyn kelesi tártippen ótkizýdi usyndy:

Elimizdiń áleýmettik-ekonomıkalyq damýynyń qorytyndylary men jyl sońyna deıin oryndaıtyn mindetter jóninde Premer-Mınıstr Asqar Mamın baıandama jasaıdy.

Aqsha-nesıe saıasatyna qatysty sharalar týraly Ulttyq banktiń tóraǵasy Erbolat Dosaev baıandaıdy.

Elimizdegi epıdemıologııalyq ahýaldy jaqsartý jónindegi sharalar týraly Densaýlyq saqtaý mınıstri Alekseı Tsoı baıandaıdy.

«Sosyn birqatar oblystyń basshylaryna sóz beremin. Qajet bolsa, basqalarǵa da sóz beriledi. Qysqa ári nusqa, negizgi máselelerge toqtalyńyzdar», - dedi Memleket basshysy.