Jurt naqty ózgeristerdiń qazir bolǵanyn qalaıdy - Prezıdent
2022 jylǵy 16 maýsym 16:37

Jurt naqty ózgeristerdiń qazir bolǵanyn qalaıdy - Prezıdent

ULYTAÝ. QazAqparat – QR Prezıdenti Qasym-Jomart Toqaev Ulytaýdaǵy Ulttyq quryltaıda konstıtýtsııalyq reforma jalǵasatynyn málim etti, dep habarlaıdy QazAqparat tilshisi.

«Konstıtýtsııalyq ózgerister, osylaısha, kezeń-kezeńimen qoldanyla bermek. Jańarǵan Konstıtýtsııa tolyqqandy qoldanysqa enýi úshin áli kóp jumys isteýimiz kerek. Biz 20-dan astam jańa zań jobasyn ázirlep, qabyldaýymyz qajet», - dedi Memleket basshysy.

Prezıdent sondaı-aq, saılaý týraly, saıası partııalar týraly jáne basqa da birqatar zańdar ózgeretinin erekshe atady.

«Saılaý týraly, saıası partııalar týraly jáne basqa da birqatar zańdardy ózgertemiz. Bul eldi tabysty jańǵyrtý turǵysynan óte mańyzdy. Zańdardy qabyldaý úshin birneshe aı, tipti, jarty jyl ýaqyt qajet bolýy múmkin. Biraq, reformany sozyp, arqany keńge salýǵa bolmaıdy. Jurt naqty ózgeristerdiń qazir bolǵanyn qalaıdy. Sondyqtan, depýtattarymyz negizgi zań jobalaryn osy kezden jınaqtaı berýi kerek. Sosyn kúzgi sessııa bastalǵanda birden iske kirisken jón.

Basty zańdar jyl sońyna deıin qabyldanýǵa tıis. Sonda ǵana jan-jaqty jańǵyrýdy joǵary qarqynmen jalǵastyra alamyz», - dedi Qasym-Jomart Toqaev.

Aıta keteıik, Prezıdent Ulytaý oblysyna jumys sapary aıasynda Ulttyq quryltaıdyń alǵashqy otyrysyna q atysyp jatyr.

Keshe Memleket basshysynyń Ulttyq quryltaı qurý týraly Jarlyǵy jarııalandy.

Ulttyq quryltaıdyń qazirgi quramynda Májilis depýtattary men QHA múshelerinen, azamattyq qoǵam men saıası partııa ókilderinen, sarapshylar men óńirlerdegi qoǵamdyq keńes múshelerinen, kásipkerlerden jasaqtalǵan 117 adam bar.

Solardyń bir parasyn atasaq, aqyn Muhtar Shahanov, qazaqtyń tuńǵysh ǵaryshkeri Toqtar Áýbákirov, akademık Asqar Jumadildaev, ekonomıst Jaqsybek Kúlekeev, saıasatker Álıhan Báımenov, jýrnalıst, medıa-menedjer, qoǵam qaıratkeri Ermurat Bápı, Parlamenttiń birneshe shaqyrylymynyń depýtaty Nurtaı Sabılıanov, balýan Dáýlet Turlyhanov, ǵalym-bıotehnolog Kúnsulý Zakarııa, dintanýshy Qaırat Joldybaı, ǵalym Anar Fazyljanova sııaqty esimder bar.

Memlekettik keńesshi Erlan Qarınniń jazbasyna súıensek, keleshekte quryltaı jumysyna qatysýshylar aýystyrylyp otyrýy múmkin.


Seriktester jańalyqtary

Jańalyqtar

Úrdis

MURAǴAT