Júregi aýyratyn adamdarǵa koronavırýstyń «omıkron» shtamy qanshalyqty qaýipti - dáriger jaýaby
2022 jylǵy 28 qańtar 21:10

Júregi aýyratyn adamdarǵa koronavırýstyń «omıkron» shtamy qanshalyqty qaýipti - dáriger jaýaby

ALMATY. QazAqparat- Kardıologııa jáne ishki aýrýlar ǵylymı-zertteý ınstıtýty Konsýltatsııalyq-dıagnostıkalyq ortalyǵynyń joǵary sanatty kardıolog dárigeri, medıtsına ǵylymdarynyń kandıdaty Botagóz Qystaýova QazAqparat tilshisine KVI ınfektsııasynyń júregi aýyratyn adamdarǵa qanshalyqty qaýipti ekenin aıtyp berdi.

- Eger adam jańa «omıkron» shtamyn juqtyrsa, ol júrek jáne júrek- qan tamyrlaryna áser etedi me ?

Infektsııadan týyndaǵan jiti qabynýdyń reaktsııasy júrek qyzmetin nasharlatyp jáne júrek qyzmetiniń kemistigi bar patsıentterde sımptomdardy asqyndyrýy múmkin. Aýyr qabyný protsesteri arıtmııany asqyndyryp, keıbir patsıentterdi júrekshe fıbrıllıatsııasyna alyp kelýi múmkin.

Vırýstyń qabynatyn áserin eskere otyryp, vırýstyq ınfektsııa koronarlyq arterııalarda aterosklerotıkalyq túıindaqtardyń (maı shógindileri) úzilýin týdyryp, ol jiti koronarlyq sındromǵa (júrek ustamasyna) ákeledi degen qaýip bar. Keýdesinde jiti jaısyzdyqty sezinetin adamdar koronavırýs sımptomdary paıda bolǵan kezde mindetti túrde dárigerge qaralýy tıis.

- Júrek-qantamyrlar júıesi aýrýlaryna shaldyqqan adamdar «omıkron» ınfektsııasyn juqtyryp alsa neni bilgenderi jón ?

Eger adamdar júrek-qantamyrlar aýrýlarynyń sımptomdaryn koronavırýs ınfektsııasy kórinisinde sezinetin bolsa, olardy nazardan tys qaldyrmaýy tıis.

Eger dene shynyqtyrý jattyǵýlary kezinde nemese tynyshtyqta keýdeńiz aýyryp, tynys alý qıyndasa, júrek qaǵysy jıilep nemese esten tanatyndaı jaǵdaı týyndasa, sizge mindetti túrde jedel járdemdi shaqyrý qajet. Mamandar emdeýge jatqyzý týraly sheshim qabyldamas buryn aıtylǵan sımptomdar men jalpy qarap-tekserýdiń negizinde Sizdiń jaı-kúıińizdi baǵalaıdy.

- Ókpeni jasandy jeldetý apparaty júregi aýratyn adamdar úshin qaýipti me ?

Dárigerler jasandy tynys alý apparatyna qosý týraly sheshimge adamdy qutqarýdyń basqa joldary bolmaǵan kezde ǵana júginedi. Patsıentterdi jasandy tnysy alý apparatyna qosýǵa beriletin kórsetkishter medıtsına qyzmetkerlerine arnalǵan usynymdarda jazylǵan. Jasandy jeldetkish ókpeniń ottegini jetkilikti túrde demala almaı jáne olarda jınalyp qalǵan kómirqyshqyl gazyn shyǵara almaǵan jaǵdaıda qajet. Bul jaǵdaıda ókpeni jasandy jeldetý apparaty tynys alý júıesiniń qyzmetin atqarady. Eger tynys ala almaǵan adamdy ókpeni jasandy jeldetý apparatyna qospasa, onyń ishki aǵzalary ottegimen qamtamasyz etilmeı qalady. Osydan keıin keshikpeı júrek óz soǵysyn toqtatady, qanmen qamtamasyz etilmeıdi, birneshe mınýttyń ishinde patsıent qaıtys bolyp ketýi múmkin. Sondyqtan, eger jasandy tynys alý apparatyna qosý qajettiligi týyndaıtyn bolsa, onda júrek aýrýlary bar nemese ol aýrýlary joq adamdar úshin jasandy tynys alý apparatynyń qaýiptiligi týraly másele talqylanbaıdy.

- «Omıkron» shtamyn juqtyrǵan júrek qan-tamyrlary aýrýymen aýratyn naýqastarǵa qandaı keńes beresiz ?

Júrek-qan tamyr aýrýlarynyń bolýy kórinisinde «omıkron» shtamyn ǵana emes basqa shtamdardy juqtyrý da asqynýlardyń damýyna ákelýi múmkin. Ol mıokard jáne tamyrlardyń sozylmaly aýrýlarynyń dekompensatsııasy nemese olardyń vırýstyq zaqymdanýy. Negizgi aýrýdyń dekompensatsııalanǵan aǵymy trombozdar, jiti júrek-ókpe jáne polıorgandyq jetispeýshiliktiń bolý qaýpin arttyrady. Bul rette:

- Juqtyrýdy boldyrmas úshin usynylatyn profılaktıkalyq sharalardy muqııat oryndaý qajet;

- Júrek jáne qan tamyrlary aýrýlary kezinde taǵaıyndalǵan dári-dármekpen emdelýdi toqtatpańyz. Bul densaýlyqtyń nasharlaýyna ákelýi múmkin;

- Aldyn ala josparlanǵan operatsııalardan bas tartýǵa bolmaıdy. Júrek nemese qan tamyrlaryynyń keıbir aýrýlary keshiktirgen jaǵdaıda jyldam órshıp, ólim jaǵdaıyna ákelýi múmkin. Operatsııany jasaý nemese ony kúte turý týraly sheshimdi kardıolog qabyldaıdy.

- Suhbatyńyzǵa rahmet!


Avtor:
Tilshi

Jańalyqtar

MURAǴAT