Jumyssyz júrgen mańǵystaýlyqtar tatarstandyq kompanııaǵa jumysqa ornalastyrylady
2022 jylǵy 30 maýsym 15:41

Jumyssyz júrgen mańǵystaýlyqtar tatarstandyq kompanııaǵa jumysqa ornalastyrylady

NUR-SULTAN. QazAqparat – Mańǵystaý oblysyndaǵy jumyssyz azamattar «Tatneft» kompanııasyna jumysqa ornalastyrylmaq, dep habarlaıdy QazAqparat «QazMunaıGaz» kompanııasyna silteme jasap.

Tatarstandyvq kompanııa ókilderi Mańǵystaý óńiriniń, sonyń ishinde Jańaózen qalasynyń turǵyndarymen kezdesý ótkizdi. Jınalǵandarǵa bos oryndar týraly aıtylyp, eńbek jaǵdaılary túsindirildi.

Kompanııa 500-ge tarta adamdy jumyspen qamtýǵa daıyn, sonyń ishinde uńǵymalardy paıdalaný jáne barlaý, kúrdeli jóndeý burǵyshylary, burǵyshynyń kómekshileri, mashınıst, slesar, elektr dánekerleýshi, kólik júrgizýshi jáne basqa da mamandardy jumysqa qabyldaıdy.

Sonymen qatar Oral jáne Aqtóbe qalalarynan jumys ornyna deıin kólikpen jetkizedi, jataqhana beredi, qajetti oqytý jáne qaıta oqytý júrgizedi.

Jumysshylarǵa vahta ádisimen jumys isteý usynylyp otyr. Bir aı jumys istep, bir aı demalady. Uńǵymany burǵylaý jáne kúrdeli jóndeý salasyndaǵy ortasha eńbekaqy 78,5 myń rýbl, mehanıkalyq jabdyqty jóndeý salasynda – 52,5 myń rýbl, al kólik júrgizýshilerdiń jalaqysy 55 myń rýbldi quraıdy. Ortasha jalaqy kóleminde vahtada bolatyn kezeńdegi jáne vahtaaralyq demalysqa beriletin jalaqy qosa eseptelgen.

Búginde Mańǵystaý oblysyna qarasty aýdandar men qalalardan 500-den asa úmitker ótinish berdi. Onyń 178 adamy irikteýden ótti.

Jumyssyz azamattardan ótinish qabyldaý áli de jalǵasýda. Mańǵystaý oblysynyń jumyspen qamtýdy úılestirý jáne áleýmettik baǵdarlamalar basqarmasy bergen aqparaty boıynsha taǵy 170 adam jumys ornalasýǵa nıet bildirdi. Endi shilde aıynyń ortasynda úmitkerlerdi irikteýdiń ekinshi kezeńi ótedi.

Tatneft ókilderi úmitkerlerdi irikteý jáne testileýdi Aqtaý qalasynda ótkizedi.

Foto: www.kmg.kz

Jańalyqtar

Úrdis

MURAǴAT