Jumyssyz qalǵan 43 myńǵa jýyq adam áleýmettik tólem aldy
2022 jylǵy 18 mamyr 11:55

Jumyssyz qalǵan 43 myńǵa jýyq adam áleýmettik tólem aldy

NUR-SULTAN. QazAqparat – Bıyl 36,1 myń azamatqa jumysynan aıyrylýyna baılanysty beriletin tólem alǵash ret taǵaıyndaldy. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti málim etti, dep habarlaıdy QazAqparat.

«1 mamyrdaǵy jaǵdaı boıynsha 43 myń adamǵa jumysynan aıyrylýyna baılanysty Memlekettik áleýmettik saqtandyrý qorynan tólem tólendi. Qoldanystaǵy zańnamaǵa sáıkes jumystan bosatylǵan qyzmetkerler mindetti áleýmettik saqtandyrý júıesine qatysý ótiline jáne sońǵy 24 aıdaǵy tabysyna baılanysty 1 aıdan 6 aıǵa deıin jumysynan aıyrylýy boıynsha áleýmettik tólemder alady. Tólem qyzmetker joǵaltqan tabystyń 40%-na deıingi mólsherde MÁSQ qarajaty esebinen júzege asyrylady», - delingen málimdemede.

Jumystan bosatylǵan adam tólem alýy úshin eGov.kz portalyndaǵy «Jumysqa ornalastyrý jáne jumyspen qamtý» bólimi arqyly onlaın tapsyrys bere alady. Munan soń bir kún ishinde ótinish berýshiniń turǵylyqty jeri boıynsha jumyspen qamtý ortalyǵy bos jumys oryndaryn usynady. Eger jumys tabylmasa, 3 kún ishinde «jumyssyz» mártebesi beriledi. Bul qyzmetti onlaın rejımde elektrondyq eńbek bırjasy (enbek.kz) arqyly da alýǵa bolady.

«Azamat jumyssyz retinde tirkelgen soń, Eńbek jáne halyqty áleýmettik qorǵaý mınıstrliginiń aqparattyq júıesi proaktıvti formatta MÁSQ-nan tólem taǵaıyndaý boıynsha qyzmet kórsetýge kelisim berý úshin uıaly telefonǵa SMS-habarlama jiberedi. Kelisken jaǵdaıda SMS-habarlamaǵa jaýap berý qajet. Tólem avtomatty túrde taǵaıyndalady», - dep habarlaıdy vedomstvo.

Aıta keteıik, MÁSQ qarajaty esebinen jumysynan aıyrylǵan jaǵdaıda tólenetin áleýmettik tólem jumystan bosatylý sebepterine qaramastan júzege asyrylady.

Buǵan deıin Qazaqstanda jarty mıllıonnan astam adam ataýly áleýmettik kómek alyp otyrǵany habarlanǵan.


Jańalyqtar

MURAǴAT