Jumys berýshiler aı saıyn tóleıtin 3,5 paıyz áleýmettik saqtandyrý ne úshin kerek

NUR-SULTAN. QazAqparat – Qazaqstanda memlekettik áleýmettik saqtandyrý júıesinde 6,6 mln adam tirkelgen, dep habarlaıdy QazAqparat tilshisi.

2005 jyldyń 1 qańtarynan bastap Qazaqstanda jumys isteıtin azamattardy áleýmettik qorǵaýdyń qosymsha tetigi retinde áleýmettik saqtandyrý júıesi engizildi.

Jumys berýshiler óz qarajaty esebinen M ÁSQ qoryna qyzmetkerdiń tabysynan 3,5% mólsherinde áleýmettik aýdarym tólep otyr.

«Búgingi tańda elimizde atalǵan júıede 6,6 mln adam saqtandyrylǵan. 2021 jyly 340 mlrd teńgege jýyq somaǵa 1,1 mln-nan astam adam qordan tólem aldy. 2005-2021 jyldar aralyǵyndaǵy áleýmettik tólemniń jalpy somasy - 2,4 trln teńgeni qurap otyr», - dep habarlady QR M ÁSQ baspasóz qyzmeti.

Memlekettik áleýmettik saqtandyrý júıesi 6 áleýmettik táýekel týyndaǵan jaǵdaıda qoldaý kórsetedi, atap aıtqanda:

1) eńbekke qabiletten aıyrylý;

2) asyraýshysynan aıyrylý;

3) jumysynan aıyrylý;

4) júktilikke jáne bosanýǵa baılanysty kirisinen aıyrylý;

5) jańa týǵan balany (balalardy) asyrap alýǵa baılanysty kirisinen aıyrylý;

6) bala bir jasqa tolǵanǵa deıin onyń kútimine baılanysty kirisinen aıyrylý.