+7 (701) 759 90 19
USD 425.75 EUR 499.32
RUB 5.85 CNY 65.88
Jańalyqtar

Jýaly aýdanynda kartop ósiretinderge jańa tehnıka tabys etildi - Jambyl oblysy

2020 jylǵy 21 tamyz 05:43
Bólisińiz:
Jýaly aýdanynda kartop ósiretinderge jańa tehnıka tabys etildi - Jambyl oblysy

TARAZ. QazAqparat – Jambyl oblysy Jýaly aýdanynda kartop ósirýshilerge jańa tehnıkalar tabys etildi, dep habarlaıdy QazAqparat tilshisi.

Jaqynda Jýaly aýdanynyń dıhandary oblys ákimine kartop ósirýdi damytýǵa kómektesý týraly ótinishpen júgingen bolatyn. Uzaq ýaqyttan beri kartop ósirýmen aınalysyp kele aýdannyń sharýalary ónim kólemin edáýir arttyrý úshin aýylsharýashylyq tehnıkasymen jáne sapaly tuqymmen qamtamasyz etýge qol ushyn berýdi suraǵan bolatyn.

Osyǵan oraı sársenbi, 19 tamyz kúni oblys ákimi Berdibek Saparbaev jergilikti fermerlerge jańa aýylsharýashylyq tehnıkalaryn tabystady.

«Birinshi kezekte tuqymǵa nazar aýdarý kerek. Eger sapaly tuqym bolmasa, jaqsy egin jınalmaıdy. Ekinshiden, tehnıkanyń mańyzdylyǵyn aıtpasaq ta túsinikti. Qýatty jáne zamanaýı tehnologııalarsyz aýyl sharýashylyǵymen tolyqtaı aınalysý múmkin emes. Sondyqtan biz kartop ósirýshilerge aldaǵy ýaqytta sapaly jańa deńgeıge kóterilýge kómektesetin birqatar jobany ázirledik», - dedi Berdibek Saparbaev fermerlermen kezdesýde.

Búgingi tańda óńirde 18,8 myń aýylsharýashylyq tehnıkasy bar, onyń 267-si kartop ósirýge arnalǵan tehnıka desek, olardyń basym bóligi eskirgen. Aımaq basshysy Jambyl oblysynda aýylsharýashylyq tehnıkasyn óndirýdi tezirek jolǵa qoıý kerektigine kóńil bóldi. Eń bolmaǵanda qarapaıym qural-jabdyqty shyǵarýdan bastaý kerek.

Búginde «Taraz» ÁKK AQ Jýaly fermerlerin zamanaýı tehnıkalarmen qamtamasyz etý úshin «AgromashHoldıng KZ» AQ-men yntymaqtastyqqa qol jetkizdi. Jaqynda 13 sharýa qojalyǵy 216 mıllıon teńgege 50 birlik tehnıka satyp alýǵa lızıngige ótinim bergen bolatyn. Lızıng merzimi – bes jyl. Birinshi jyly sharýa qojalyqtaryna demalys beriledi. Osylaısha atalǵan qarjyǵa 15 lovol traktory, tyrma, soqa, kartop qazǵysh, kýltıvator jáne otandyq jáne sheteldik óndiristiń basqa da tehnıkasy satyp alyndy.

«Bul joba boıynsha jumys bir aı buryn bastaldy. Kóptegen fermerler onyń tıimdiligine kúmándanyp, bizben jumys isteýge yntalary bolmady. Al, joba iske qosylǵannan keıin bizge lızıngige tehnıka satyp alǵysy keletin taǵy 10 sharýa qojalyǵy júgindi», - dedi «Taraz» ÁKK AQ tóraǵasy Oljas Qarjaýov.

Oblys ákiminiń tapsyrmasyna sáıkes osy kúzde óńirde Trade-in júıesi iske qosylady dep kútilýde. Bul avtokólik júrgizýshilerine jaqsy tanys, ol boıynsha belgili bir somany tólep, eski aýyl sharýashylyǵy tehnıkasyn jańasyna aýystyrýǵa múmkindik týady. 2020 jyly 100 birlik tehnıkany, al 2021 jyly 400-500 tehnıkany aýystyrý josparlanýda.

Kelesi mańyzdy joba kartop tuqymyna baılanysty. Jaqyn arada Jýalyda kartop ósirýshi úshin 600 myń tonna gollandııalyq birinshi reprodýktsııaly tuqym satyp alý josparlanyp otyr. Oǵan 300 mıllıon teńge bólindi. Qazirgi tańda Jýaly aýdanynda negizinen tuqymnyń 3-4 reprodýktsııasy qoldanylady. Al, gollandııalyq tuqym óte joǵary sapaly jáne joǵary ónimdiligimen erekshelenedi. Fermerler jergilikti alqaptarda ósirilgen ónimmen tólem jasamaq. Sonymen qatar, «Taraz» ÁKK» AQ fermerlerge ósirilgen kartopty satýda kómektesedi.


Osy aýqymdy jobalardy iske qospas buryn «Taraz» ÁKK» AQ ókilderi daıyndyq jumysyn jan-jaqty pysyqtaǵan. Olar búkil eldi kartoppen qamtamasyz etip otyrǵan Qazaqstannyń soltústik aımaqtarynyń jetekshi kartop ósirýshilerimen keńesip, Pavlodar, Qostanaı, Aqmola oblystarynyń fermerlerimen kezdesý ótkizgen.


Aıta ketý kerek, bıyl oblysta 11,2 myń gektar aýmaqqa kartop egildi, onyń 25 paıyzy nemese 2560 gektary Jýaly aýdanyna tıesili. Búgingi tańda oblysta tórt myń gektar alqaptan 121,3 myń tonna kartop jınaldy. Jalpy alǵanda, 270 myń tonna kartop jınaý josparlanǵan.


Bizdiń kanalymyzǵa jazylyńyz:

Bólisińiz:

Avtor:

Qajy Murat

Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER

MURAǴAT