Joǵary ınflıatsııa halyqtyń satyp alý qabiletin tómendetip, jalaqysynyń qunsyzdanýyna áser etedi – Úkimet basshysy
NUR-SULTAN. QazAqparat – Inflıatsııanyń joǵary bolýy adamdardyń satyp alý qabiletin tómendetip, jalaqysynyń qunsyzdanýyna áser etedi. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat tilshisi.
«Memleket basshysy Qasym-Jomart Kemeluly Toqaev Parlament Májilisinde sóılegen sózinde ınflıatsııa máselelerine erekshe kóńil bólip, baǵany turaqtandyrý mindetin qoıdy. Inflıatsııa deńgeıi ótken jyly qyrkúıektegi 8,9 paıyzdan jeltoqsanda 8,4 paıyzǵa deıin tómendedi. Biraq bul da – joǵary kórsetkish. Bul adamdardyń satyp alý qabiletin tómendetip, jalaqylarynyń qunsyzdanýyna áser etedi. Tutastaı alǵanda memlekettiń ekonomıkalyq jáne áleýmettik saıasatynyń tıimdiligin tómendetedi», - dedi Úkimet basshysy.
Sondyqtan ol ınflıatsııa men baǵa turaqtylyǵyna erekshe mańyz berilip otyrǵanyn basa aıtty.
«Azyq-túlik taýarlaryn óndirý kólemin arttyrýǵa, ishki naryqta taýarlardyń jetkilikti bolýyna, energııa kózderine baǵa belgileý tetigi men aqyly qyzmetterdiń tarıfterin qaıta qaraýǵa múmkindik beretin júıeli is-sharalar qabyldaý qajet», - dedi Álıhan Smaıylov.
