«Jibek joly» kemesine baılanysty  Qazaqstanǵa sanktsııa salynbaıdy –Óskenbaev
2022 jylǵy 5 shilde 12:21

«Jibek joly» kemesine baılanysty Qazaqstanǵa sanktsııa salynbaıdy –Óskenbaev

NUR-SULTAN. QazAqparat – QR Indýstrııa jáne ınfraqurylymdyq damý mınıstri Qaıyrbek Óskenbaev Ýkraına tarabynyń shaǵymyn týdyrǵan «Jibek joly» kemesiniń áreketinen Qazaqstanǵa sanktsııa salynbaıdy dedi, dep habarlaıdy QazAqparat tilshisi.

«Ol keme Reseı kompanııalaryna jalǵa berilgen. Jalǵa alǵan Reseı kompanııasyna eshqandaı sanktsııa salynǵan joq. Olarǵa eshqandaı shekteý joq. Sol sebepti bizdiń kásipkerler, ıaǵnı QTJ-ǵa qarasty KTZ Express Shipping kompanııasy ony jalǵa berdi. Olar ne tasyǵanyn ózderińiz de kórip otyrsyzdar ǵoı. Ol bizge de jańalyq bolyp tur. Zańdy túrde tasıtyn taýar bolsa, eshqandaı shekteý joq. Al biraq shart boıynsha bir eldiń zańyn buzatyndaı jaǵdaı bolsa, onda bizdiń kásipkerler másele kóterip, ol kemeni keri qaıtarýǵa quqyǵy bar», - dedi mınıstr.

BAQ ókilderi «Atalǵan kemeniń áreketinen Qazaqstanǵa sanktsııa salynýy múmkin be» dep surady.

«Bul jaǵdaı sanktsııa sııaqty saldarǵa aparyp soqpaıdy. Biz jalǵa bergende ol kásipker sanktsııada bolsa, basqa da shekteýlerge alynsa, bizge ýáj aıtýǵa quqyǵy bar bolatyn edi. Biraq ol kompanııaǵa eshqandaı shekteý qoıylǵan joq. Sol sebepti zańdy túrde shaǵym berdi. Biraq ol jaqtan zańbuzýshylyq bolsa, Túrkııa nemese Ýkraına bizge resmı túrde baıandama berse, onda biz de zerttep, tıisti shara qabyldap, óz sheshimizdi belgileımiz», - dedi mınıstr.

Qazaqstan «Jibek joly» kemesin jalǵa alǵan reseılik kompanııamen kelisimshartty buzýy múmkin.

Buǵan deıin belgili bolǵandaı Túrkııadaǵy Ýkraına elshisi Vasılıı Bodnar qazaqstandyq «Jibek joly» kemesimen tasymaldanǵan astyq jóninde jergilikti bılikke júgingeni habarlanǵan bolatyn.

«Qazaqstan temir joly» ulttyq kompanııasy qazaqstandyq «Jibek joly» kemesimen Ýkraınadan astyq eksporttalyp jatqanyna qatysty pikir bildirdi.

Sonymen birge QTJ kemeni jalǵa alýshydan mán-jaıdy jedel ári egjeı-tegjeıli túsindirýdi surady.


Seriktester jańalyqtary

Jańalyqtar

Úrdis

MURAǴAT