Jetisý oblysy ákiminiń taǵy eki orynbasary men apparat basshysy taǵaıyndaldy
2022 jylǵy 27 maýsym 18:08

Jetisý oblysy ákiminiń taǵy eki orynbasary men apparat basshysy taǵaıyndaldy

TALDYQORǴAN. QazAqparat - Jetisý oblysy ákiminiń eki orynbasary taǵaıyndaldy, dep habarlaıdy QazAqparat tilshisi.

Jetisý oblysy ákiminiń orynbasary bolyp Álibek Jaqanbaev taǵaıyndaldy.

Álibek Áskerbekuly 1964 jyly týǵan.

Bilimi joǵary. Qazaqtyń Eńbek Qyzyl Tý ordendi aýyl sharýashylyǵy ınstıtýtyn «orman sharýashylyǵy», Qazaq ulttyq agrarlyq ýnıversıtetin «memlekettik jáne jergilikti basqarý» mamandyqtary boıynsha bitirgen.

Eńbek jolyn Alakól aýdanynda «Levoberejnyı» keńsharynyń jumysshysy bolyp bastaǵan. Uzaq jyl Alakól aýdany Úsharal qalasynda orman sharýashylyǵy salasynda eńbek etti.

Sarqan, Alakól, Eńbekshiqazaq aýdandarynyń ákimi qyzmetterin atqardy.

2022 jyldyń aqpanynan Almaty oblysy ákiminiń orynbasary boldy.

Sondaı-aq Jetisý oblysy ákiminiń áleýmettik sala boıynsha orynbasary laýazymyna Rýstam Álı taǵaıyndaldy.

Rýstam Álı 1984 jyly týǵan.

Ál-Farabı atyndaǵy Qazaq ulttyq ýnıversıtetiniń magıstratýrasy men doktorantýrasyn «shyǵystaný», І.Jansúgirov atyndaǵy Jetisý memlekettik ýnıversıtetin «qarjy» mamandyqtary boıynsha bitirgen. PhD doktory.

Eńbek jolyn Almaty qalasynda «Delovaıa nedelıa» gazetinde tilshi bolyp bastap, osy gazette bólim redaktory, bas redaktordyń orynbasary boldy.

Ár jyldarda Almaty oblystyq ishki saıasat basqarmasynyń «Jetisý jastary» jastar ortalyǵy dırektory, Eskeldi aýdany Qaınarly aýyldyq okrýginiń ákimi, Almaty oblysy jastar saıasaty máseleleri basqarmasynyń bastyǵy, oblystyq ishki saıasat basqarmasynyń bastyǵy, Almaty oblysy ákiminiń orynbasary laýazymdaryn atqardy.

2021 jyldyń mamyrynan Eskeldi aýdanynyń ákimi boldy.

Sonymen qatar Nurjan Eginbaev Jetisý oblysy ákimi apparatynyń basshysy bolyp taǵaıyndaldy.

Nurjan Janaıdaruly Eginbaev 1975 jyly týǵan. Bilimi joǵary. Qazaq memlekettik ekonomıkalyq ýnıversıtetin, D.A.Qonaev atyndaǵy gýmanıtarlyq ýnıversıtetti bitirdi, bidliktiligi boıynsha - «ekonomıst», «zańger». Eńbek jolyn «Tirek» JShS-da ekonomıst bolyp bastady. Birshama ýaqyt Іshki ister organdarynda qyzmet etti.

Esterińizge sala keteıik, buǵan deıin Jeńis Tuıaqov Jetisý oblysy ákiminiń orynbasary bolyp taǵaıyndalǵanyn habarlaǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT