Jer qoınaýyn óz betinshe paıdalanǵandar 3 jylǵa deıin bas bostandyǵynan aıyrylýy múmkin
2022 jylǵy 29 maýsym 10:45

Jer qoınaýyn óz betinshe paıdalanǵandar 3 jylǵa deıin bas bostandyǵynan aıyrylýy múmkin

NUR-SULTAN. QazAqparat – Budan bylaı Jer qoınaýyn óz betinshe paıdalanǵandar 3 jylǵa deıin bas bostandyǵynan aıyrylýy múmkin. Májiliste Ekologııa, geologııa jáne tabıǵı resýrstar mınıstri Serikqalı Brekeshev Qylmystyq kodekske osyndaı túzetý engizýdi usyndy, dep habarlaıdy QazAqparat tilshisi.

«Qylmystyq kodekstiń «Jer qoınaýyn óz betinshe paıdalaný», ıaǵnı, 334-babynda jazanyń bultartpastyǵyn qamtamasyz etý jáne jer qoınaýyn zańsyz óndirýge jol bermeý maqsatynda 334-baptyń 1-bóligi «qylmystyq teris qylyq» sanatynan «qylmysqa» aýystyrylyp, 3 jylǵa deıin bas bostandyǵynan aıyrý túrindegi jazany engizý arqyly sanktsııa kúsheıtiledi. Osy baptyń 2-bóliginiń sanktsııasy da 3 jyldan 4 jylǵa bas bostandyǵynan aıyrý túrindegi jazany qatańdatý arqyly ózgertildi. Osy baptyń 1-bóliginiń dıspozıtsııasyna ózgerister engizildi. Atap aıtqanda, qylmystyq quqyq buzýshylyqtyń quramyn qalyptastyrý úshin keltirilgen zalal mólsheriniń shegi, ıaǵnı iri mólsherden eleýli zalalǵa deıin tómendetildi. 3-bólimde erekshe qorǵalatyn tabıǵı aýmaqta asa iri zalal keltirgeni úshin jazanyń neǵurlym qatań túrin qarastyrý usynylady», - dedi mınıstr.

Onyń aıtýynsha, «Aǵashtar men butalardy zańsyz kesý, joıý nemese zaqymdaý» kodekstiń 340-babynda «teris qylyq» sanatynan «qylmys» sanatyna aýystyrý týraly ózgerister engizilgen.

«Erekshe qorǵalatyn tabıǵı aýmaqtar rejımin buzý» 342-babynyń 1-bóligi kúsheıtiledi jáne biliktilik belgileri bóline otyryp, 3 jáne 4-bóliktermen tolyqtyrylady, sondaı-aq asa iri zalal keltirgen áreketter úshin jaýapkershilik kózdeledi», - dedi Serikqalı Brekeshev.

Buǵan deıin atalmysh vedomstvo Ulttyq parkterde 685 shaqyrymdyq týrıstik marshrýt jasalǵanyn habarlaǵan bolatyn.


Uqsas jańalyqtar

Jańalyqtar

Úrdis

MURAǴAT