Jeńistiń 75 jyldyǵy: Saparbaev ardagerlerge biryńǵaı tólem belgileýdi tapsyrdy

NUR-SULTAN. QazAqparat - Úkimet úıinde Premer-Mınıstrdiń orynbasary Berdibek Saparbaevtyń tóraǵalyǵymen Ekinshi dúnıejúzilik soǵystaǵy Jeńistiń 75 jyldyǵyn Qazaqstan Respýblıkasynda atap ótý jáne oǵan daıyndyqty uıymdastyrý jónindegi Vedomstvoaralyq komıssııanyń otyrysy ótti, dep habarlaıdy QazAqparat Úkimet basshysynyń resmı saıtyna silteme jasap.

Uqsas jańalyqtar

Asqar Mamın Jańǵyrtý jónindegi ulttyq komıssııanyń otyrysyn ótkizdi

Nurlan Noǵaev reseılik áriptesimen kezdesti Jandarbek Bekshın: Beıjińnen ushyp kelgen qazaqstandyqtardy tekserý jalǵasady Dáýren Abaev «Rýhanı jańǵyrý» baǵdarlamasynyń jańa jobalary týraly aıtty

Qorǵanys mınıstriniń birinshi orynbasary - Qarýly Kúshterdiń Bas shtabynyń bastyǵy Murat Bektanov tıisti sharalar Josparynyń jobasy týraly aqparatty usyndy. Atap aıtqanda, Jeńistiń mereıtolyq jylynda mynadaı is-sharalar josparlanǵan:

áskerı sherý ótkizý;

EDS jyldary qaza tapqan qazaqstandyq jaýyngerlerdiń eskerilmeı qalǵan molalaryn jáne kómilmeı qalǵan qaldyqtaryn anyqtaý boıynsha izdeý jumystaryn júrgizý;

ardagerlerdiń TMD elderiniń aýmaǵynda ótkiziletin sharalarǵa qatysýy;

ardagerlerge áleýmettik kómek kórsetý;

mereıtoılyq medaldar tapsyrý, mádenı-buqaralyq sharalar uıymdastyrý.

Jospar jobasynda barlyǵy 67 is-shara qarastyrylǵan.

Berdibek Saparbaev árbir oblysta Jeńistiń mereıtoılyq jylyn atap ótýge daıyndyq jónindegi óńirlik komıssııalardyń jumysyn uıymdastyrý qajettigin aıtty.

Sonymen qatar, vıtse-premer Eńbek jáne halyqty áleýmettik qorǵaý mınıstrligine ákimdiktermen jáne «QR Ardagerler uıymy» RQB Ortalyq keńesimen birge Jeńistiń 75 jyldyǵyna oraı soǵys ardagerleri men múgedekterine birdeı bir rettik tólem somasyn belgileý máselesin pysyqtaýdy tapsyrdy.

«UOS ardagerlerin, tyl eńbekkerlerin, tarıhı mıssııany oryndap, fashızmdi jeńýge úles qosqan qazaqstandyqtardy ardaqtaý jalpy memlekettik aýqymdaǵy shara. Biz kúsh-jigerimizdi olardy jan-jaqty qodldaýǵa baǵyttaýymyz qajet. Eshbir ardager nazardan tys, qamqorlyqsyz qalmaýy tıis», - dedi B. Saparbaev.

Keńesti qorytyndylaǵan vıtse-premer Jeńistiń mereıtoılyq jylyn atap ótý boıynsha barlyq sharalar elimizdegi qoǵamdyq-saıası turaqtylyqty qamtamasyz etýge, qoǵamnyń QR Tuńǵysh Prezıdenti - Elbasy men Memleket basshysynyń saıasatyna baǵyttalýyna, jas urpaqtyń boıynda ultjandylyq sezimdi nyǵaıtýǵa baǵyttalýy tıis ekenin jetkizdi.

VAK otyrysyna sonymen qatar qorǵanys, ishki ister, qarjy, eńbek jáne halyqty áleýmettik qorǵaý mınıstrlikteriniń, «QR Ardagerler uıymy» RQB Ortalyq keńesiniń jáne basqa da múddeli memlekettik organdardyń ókilderi, sondaı-aq oblys ákimderiniń, Nur-Sultan, Almaty, Shymkent qalalary ákimderiniń orynbasarlary qatysty.