Jeńildetilgen turǵyn úı baǵdarlamasyna 11 myńnan asa almatylyqtan ótinish tústi
2022 jylǵy 1 shilde 16:18

Jeńildetilgen turǵyn úı baǵdarlamasyna 11 myńnan asa almatylyqtan ótinish tústi

ALMATY. QazAqparat - «Almaty jastary» baǵdarlamasyna 11 myńnan asa almatylyqtan ótinish kelip tústi. Bul týraly Óńirlik kommýnıkatsııalar qyzmetiniń brıfınginde Almaty qalasy kommýnaldyq ınfraqurylymdy damytý basqarmasy basshysynyń orynbasary Ermek Ámirov málim etti, dep habarlaıdy QazAqparat tilshisi.

Ermek Ámirovtyń sózinshe, ótinishterdi qabyldaý arnaıy qurylǵan www.almaty-zhastary.kz saıty arqyly 2022 jyldyń 18 mamyry men 1 maýsymy aralyǵynda júrgizildi. «Bizge bilim, densaýlyq saqtaý, áleýmettik qyzmetter, joǵary oqý oryndary men ǵylymı-zertteý ınstıtýttary, quqyq qorǵaý organdary, mádenıet, BAQ jáne sport salasynyń qyzmetkerlerinen barlyǵy 11 199 ótinish kelip tústi.

Búginde barlyq kelip túsken ótinishterdiń talaptarǵa sáıkestigi tekserildi. Nátıjesinde 1676 ótinish qanaǵattandyryldy», - dedi spıker. Ótinishter men qujattardy berý ESQ kilti arqyly júzege asyryldy. 5042 úmitkerdiń ótinishi qabyldanǵan joq. «5042 úmitkerdiń ótinishi qabyldanǵan joq. Sebebi, Qazaqstan Respýblıkasynda nemese Almaty oblysy, Almaty qalasynda barlyq otbasy músheleriniń turǵyn úıiniń bolýy/bolmaýy týraly anyqtamalar; balalardyń týý, neke nemese ajyrasý týraly kýálikterin skanerleý; eńbek kitapshasynyń kóshirmesi; jumys ornynan anyqtama nemese zeınetaqy jarnalary týraly úzindi kóshirmesin usynbaǵan»,- dedi Ermek Ámirov.

Taǵy 408 ótinish sońǵy 6 aıda zeınetaqy jınaqtarynyń bolmaýyna baılanysty qabyldanbaǵan. «3847 ótinish jumys ornynyń baǵdarlama talaptaryna sáıkes kelmeýine baılanysty qabyldanbady. 65 jaǵdaıda Qazaqstan Respýblıkasyndaǵy menshiginde turǵyn úıdiń bolýyna baılanysty, sondaı-aq basqa da sebepter boıynsha, onyń ishinde múlikti ıelikten shyǵarýǵa baılanysty bas tartyldy»,- deıdi ol.

Kommýnaldyq ınfraqurylymdy damytý basqarmasy basshysynyń orynbasary baǵdarlamaǵa qatysýshylardyń jeke kabınetinde de, veb-saıttaǵy ótinimder tizimderinde de berilgen ótinimniń kúıin óz betinshe baqylaýy qajettigin aıtty. «Baǵyttar boıynsha jınaǵan upaılaryna qaraı alǵashqy 1000 qatysýshyǵa saıttaǵy jeke kabınetine joldama beriledi, oń baǵalanǵan qalǵan 676 qatysýshy negizgi tizim tólem qabilettiliginen ótkenge deıin rezervte bolady», - dep atap ótti basqarma ókili.

Barlyq iriktelgen ótinish berýshilerge «Otbasy Banki» AQ tólem qabilettiligin rastaý úshin joldama beriledi. Joldama alǵan ótinish berýshiler tólem qabilettiligin baǵalaýdan ótý úshin 15 jumys kúni ishinde «Otbasy banki» AQ kez kelgen qyzmet kórsetý ortalyǵyna habarlasýy qajet.

Tólem qabilettiligin sátti rastaǵan qatysýshylar 45 kúntizbelik kún ishinde bastapqy jáne qaıtalama naryqta baspanany óz betinshe tańdaıdy. Turǵyn úı zaemyn berý múmkindigin qarastyrý úshin tańdalǵan turǵyn úıge qujattar bankte usynylady. «Otbasy Bankine» kelmegen nemese tólem qabilettiligi rastalmaǵan jaǵdaıda, Almaty qalasynyń ákimdigi onyń kúshin joıýǵa jáne kelesi qatysýshyǵa joldama berýge quqyly.

Eske salsaq, Almaty qalasynyń 35 jasqa deıingi jastaryn qoldaý maqsatynda 2022 jyly «Almaty jastary» jeńildetilgen nesıeleýdiń qalalyq baǵdarlamasy ázirlenip, iske qosylǵan bolatyn.


Uqsas jańalyqtar

Jańalyqtar

Úrdis

MURAǴAT