Jeńildetilgen avtonesıe kelesi aptadan bastap berilýi múmkin – mınıstr
2022 jylǵy 4 mamyr 12:54

Jeńildetilgen avtonesıe kelesi aptadan bastap berilýi múmkin – mınıstr

NUR-SULTAN. QazAqparat – Úkimet úıindegi brıfıngte halyqty jeńildetilgen avtonesıeleý jumystary qashan bastalatyny aıtyldy, dep habarlaıdy QazAqparat tilshisi.

«Avtonesıe sharttary bekitildi. Tek bekitilgennen keıin zań boıynsha 10 kún tirkeýden ótýi kerek. Bizdiń qujattar tolyǵymen 15 sáýirde bekitilgen, tıisinshe Ekologııa mınıstrligi de qujattardy 24 sáýirde bekitti. Biraq tirkeýden ótý sekildi rásimder shamamen 10 kúnge sozylady», - dedi Indýstrııa jáne ınfraqurylymdyq damý mınıstri Qaıyrbek Óskenbaev Úkimet úıinde ótken baspasóz máslıhatynda.

Mınıstrdiń aıtýynsha, 6 mamyrǵa deıin qarajat Ónerkásipti damytý qoryna aýdarylady.

«Bul - «Báıterek» qorynyń aktsıonerlik qoǵamy. Báıterek qory, Qazaqstannyń ónerkásipti damytý qory ózi jumys isteıtin banktermen shart jasasýy tıis. Osydan keıin olar atalǵan bankterdiń shotyna aqsha aýdarýy kerek jáne bankter jumysqa kirisýi kerek. Oǵan qansha ýaqyt ketetinin ár bankpen jeke anyqtaımyz. Ázirge birneshe bankpen ýaǵdalastyq bar. Olarmen kelisim jasaldy, qazir bul jumys pysyqtalyp jatyr», - dedi Q. Óskenbaev.

Sonymen birge, QR Ekologııa, geologııa jáne tabıǵı resýrstar mınıstri Serikqalı Brekeshev ýtılızatsııalyq alymnyń somasyn azaıtý buıryǵy qashan kúshine enetinin aıtty.

«Bul buıryq búkil memlekettik organdarmen kelisildi jáne Ádilet mınıstrligine memlekettik tirkeýge jiberildi. Ádilet mınıstrliginen shyqqan soń belgili bolady», - dedi Serikqalı Brekeshev.

Ekologııa mınıstrligi baspasóz qyzmetiniń naqtylaýynsha, ýtıl alymyn 50 paıyzǵa deıin tómendetý buıryǵy 11 mamyrda kúshine enedi.


Seriktester jańalyqtary

Jańalyqtar

Úrdis

MURAǴAT