Jeńildetilgen avtonesıe alýǵa nıet bildirgen 4 290 azamattyń ótinishi maquldandy
2022 jylǵy 19 mamyr 17:32

Jeńildetilgen avtonesıe alýǵa nıet bildirgen 4 290 azamattyń ótinishi maquldandy

NUR-SULTAN. QazAqparat – Jeńildetilgen avtonesıege ótinish bergen 4290 qazaqstandyqtyń ótinishi oń sheshimin taýyp, 31,7 mlrd teńge kóleminde nesıe bekitildi. Bul týraly «Ónerkásipti damytý qory» AQ basqarma tóraǵasynyń orynbasary Janar Ibrasheva málim etti, dep habarlaıdy QazAqparat tilshisi.

«Qazir jeńildetilgen avtonesıe berý jumysy qarqyndy júrip jatyr. Azamattar ótinishin ekinshi deńgeıli bankter qabyldap jatyr. Qazirgi sátte 4290 azamattyń ótinishi oń sheshimin tapty. Oǵan bólingen nesıeniń kólemi 31,7 mlrd teńgeni qurap otyr. Búginde «Bank TsentrKredıt», Halyk Bank jáne Eýrazııa banki ótinish qabyldap jatyr. Erteńnen bastap bul qatarǵa Forte Bank qosylady dep otyrmyz», - dedi Janar Ibrasheva.

Onyń aıtýynsha, avtonesıege ótinish berý jumysy el kóleminde júrip jatyr.

«Statıstıka únemi ózgerip turady. Joǵaryda aıtylǵan málimet - qazirgi jaıt. Jeńildetilgen avtonesıe kádimgi nesıe alý sekildi. ıAǵnı, aldymen klıenttiń nesıeni óteý múmkindigi qaralady. Sondyqtan da keı klıentterdiń ótinishi keri qaıtarylýy múmkin. Bul týraly tolyǵyraq bankterden bilý kerek. Avtokólikke qol jetkizý de ár jaǵdaıǵa baılanysty. Klıent avtosalonǵa kelip kólikti qaraıdy, eger qalaǵan mashınasy bar bolsa, sol jerde birden rásimdeıdi. Eger klıent qalaǵan avtokólik joq bolsa, onda kútedi», - deıdi ol.

Atalǵan qordyń málimetinshe, avtonesıege ótinish berýshiler boıynsha Almaty qalasy kósh bastap tur. Odan bólek, úshtikke Túrkistan oblysy jáne Nur-Sultan qalasy kirip otyr.

Aıta keteıik, 16 mamyrda Qazaqstanda jeńildetilgen avtonesıe berý bastaldy.


Seriktester jańalyqtary

Jańalyqtar

Úrdis

MURAǴAT