Jeke kásipkerlerdi múmkindigi shekteýli jandardy jumysqa alýǵa yntalandyrý kerek – Smaıylov
2022 jylǵy 5 shilde 14:26

Jeke kásipkerlerdi múmkindigi shekteýli jandardy jumysqa alýǵa yntalandyrý kerek – Smaıylov

NUR-SULTAN. QazAqparat – Múgedektigi bar adamdardyń turmys sapasyn jaqsartý máselesi memlekettik organdardyń birinshi basshylarynyń udaıy baqylaýynda bolýy kerek. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Bizdiń mindetimiz – múgedektigi bar adamdar úshin ómir súrýge qolaıly orta qalyptastyrý. Ol úshin memleket tarapynan únemi qoldaý kórsetilip keledi. Tıisti zańnamalyq túzetýler qabyldanyp, múgedektigi bar adamdar men olardyń otbasylarynyń tabysyn arttyrý, ómir sapasyn jaqsartý baǵytynda aýqymdy jumys atqaryldy. Endi jeke kásipkerlik sýbektilerin múmkindigi shekteýli azamattardy jumysqa alýy úshin yntalandyramyz», - dedi Á. Smaıylov Úkimettiń búgingi otyrysynda.

Premer-Mınıstr Memleket basshysynyń múgedektikti belgileý rásimin jeńildetýdi tapsyrǵanyn eske saldy.

«Jyl basynan beri múgedektikti syrttaı belgileý pılottyq jobasy búkil respýblıka boıynsha keńeıtildi. Áleýmettik qyzmetter portaly arqyly tehnıkalyq quraldar men emdik-saýyqtyrý qyzmetterin alý merzimi 8 aıdan 30 kúnge deıin qysqardy. Bıyl jyl sońyna deıin 17 erte ońaltý-aralasý ortalyǵy ashylady. Olar jańa týǵan nárestelerdegi patologııany der kezinde anyqtaýǵa jáne emdeýdi qamtamasyz etýge múmkindik beredi. Óńirlerde múgedektigi bar adamdarǵa arnalǵan 12 saýyqtyrý ortalyǵy salynýda. Bul áleýmettik qorǵaý júıesinde qosymsha 25 myń adamdy emdik-saýyqtyrý sharalarymen qamtýǵa múmkindik beredi», - dedi Álıhan Smaıylov.

Sonymen birge, Úkimet basshysy memlekettik organdarǵa múmkindigi shekteýli adamdardy qoldaýdyń keshendi sharalaryn jalǵastyrýy qajettigin aıtty.

«Eńbek mınıstrligi Densaýlyq saqtaý jáne Tsıfrlyq damý mınıstrlikterimen birge syrttaı kýálandyrýdy engizý úshin aqparattyq júıelerdi ıntegratsııalaý men áleýmettik qyzmetter portalyn jetildirý jumystaryn jalǵastyrsyn. Óńir ákimdikteri jyl sońyna deıin muqtaj adamdardy tehnıkalyq quraldarmen jáne saýyqtyrý qyzmetterimen qamtý kórsetkishin 90%-ke jáne 2023 jyldyń sońyna qaraı 100% jetkizsin. Múgedektigi bar adamdardy kúndiz qabyldaıtyn bólimsheler jelisin keńeıtip, áleýmettik qyzmet kórsetetin shaǵyn úıler qurý qajet», - dedi ol.

Densaýlyq saqtaý mınıstrligi ákimdiktermen birge naýqastardy erterek dıagnostıkalaýǵa jáne múgedektiktiń aldyn alý úshin erte ońaltýǵa erekshe nazar aýdaýy kerek.

«Jalpy Indýstrııa, Saýda, Densaýlyq saqtaý, Eńbek mınıstrlikteri ákimdiktermen birlesip, múgedektigi bar adamdar úshin beıimdeý jáne qoljetimdi orta qalyptastyrýdyń ulttyq biryńǵaı standartyn ázirleýi kerek dep sanaımyn. Múgedektigi bar adamdardyń turmys sapasyn jaqsartý máseleleri ortalyq jáne jergilikti memlekettik organdardyń birinshi basshylarynyń udaıy baqylaýynda bolýy tıis», - dedi Álıhan Smaıylov.


Foto: primeminister.kz

Jańalyqtar

Úrdis

MURAǴAT