Jastar jyly: Prezıdent aýylǵa barǵan jastardyń járdemaqysyn kóbeıtýdi tapsyrdy

ASTANA. QazAqparat - QR Prezıdenti Nursultan Nazarbaev «Dıplommen aýylǵa» baǵdarlamasyn damytýdy tapsyrdy , dep habarlaıdy QazAqparat tilshisi.

Prezıdenttiń aıtýynsha, búginde halyqtyń aýyldan qalaǵa kóshý qarqyny qatty bolsa da, aýyl jastarynyń úlesi áli de joǵary - 43 protsent. Ótken jyly on bir aıdyń ishinde elimizde aýyldan qalaǵa kóshken jastardyń sany 220 myńnan asty.

«Sondyqtan Úkimet pen ákimdikter jastardyń bilim alýyna, jumysqa ornalasýyna, demalys jáne basqa da máselelerin júıeli sheshýge kúsh salýy qajet. «Aýyl - el besigi» jobasy aıasynda ınfraqurylymdy damytyp, jergilikti jerlerdiń kadrlyq áleýetin kúsheıte túsýimiz kerek. Bizde «Dıplommen aýylǵa» degen baǵdarlama bar. Osynyń tizimin keńeıtýdi usynamyn. Aýylǵa kóship barǵany úshin jastardyń járdemaqysy buryn 70 aılyq eseptik kórsetkish bolsa, sony 100 aılyq eseptik kórsetkishke deıin kóterý kerek», - dedi N.Nazarbaev Jastar jylynyń saltanatty ashylý rásiminde.

Osy oraıda Memleket basshysy aýyl sharýashylyǵymen keńinen aınalysýǵa úndedi. Sebebi qazirgi ýrbanızatsııaǵa qaramastan, azyq-túlik ónimderine degen suranys eshqashan tómendemeıdi. Al ondaı ónimderdiń basym bóligi aýyldy jerlerde óndiriledi.

Aıta keteıik, elordadaǵy «Nur álem» pavılonynda Elbasy Nursultan Nazarbaevtyń qatysýymen «Táýelsizdik urpaqtary» atty jastar jylynyń saltanatty ashylý rásimi ótip jatyr.

QR Prezıdenti Nursultan Nazarbaev Qazaqstan halqyna ótken jylǵy Joldaýynda 2019 jyldy Jastar jyly dep jarııalaýdy usynǵan bolatyn. Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan edi. Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.