+7 (701) 759 90 19
USD 420.79 EUR 511.98
RUB 5.67 CNY 64.46
Jańalyqtar

Jas kásipker: 20-30 jas arasyn bos ótkizýge bolmaıdy

2020 jylǵy 17 qazan 17:44
Bólisińiz:
Jas kásipker: 20-30 jas arasyn bos ótkizýge bolmaıdy

NUR-SULTAN. QazAqparat – Koronavırýs indeti ómir saltymyzdy ózgertip, qundylyqtarymyzdyń ózgerýine, jańa mashyq qalyptastyrýymyzǵa yqpal etti. Elordalyq jas kásipker Erbolat Alpysbaev QazAqparat tilshisine bergen suhbatynda karantın ýaqytynda paıdaly ispen aınalysqanyn aıtty. Ol bastaǵan isi júrmeı, bıznesi toqtap qalǵanyna qaramastan jetistikke jetken qazaqstandyqtardyń ómir jolyn mysalǵa ala otyryp qıyndyqty qalaı eńserip, eńseni túsirmeý joldaryn úıretetin kitap shyǵarǵan.

Uqsas jańalyqtar
Atyraýda múmkindigi shekteýli áıel balalar kıimin tigetin sheberhana ashty Mańǵystaýlyq zergerdiń buıymdary Reseı men Ýkraınada suranysqa ıe Mańǵystaýlyq kásipker eshki sútinen tabıǵı ónimder daıyndaıdy

Jas kásipker Erbolat Alpysbaev bıyl L.N.Gýmılev atyndaǵy Eýrazııa ulttyq ýnıversıtetin bitirgen. Ol 18 jasynan beri kásipkerlikpen aınalysyp keledi. Mektep jasynda balmuzdaq satsa, keıin gúl satýmen aınalysqan. Ýnıversıtettiń úshinshi kýrsynda oqyp júrgen kezinde ǵımarat jaldap, «JDI» dep atalatyn tilderdi úıretý mektebin ashqan.

«Til úıretetin mektep ashqan kezde meniń qarajatym bolǵan joq, degenmen táýekel etý kerek boldy. Ǵımaratty jalǵa berýshige aıdyń aıaǵynda eseptesetinimdi aıttym. Ol kelisimin berdi. Odan keıin eki aǵylshyn tilin oqytýshyny taýyp, olarǵa da jalaqysyn aıdyń sońynda beretinimdi aıttym. Belsendi stýdent bolǵanym ózime kómek boldy. Sonyń arqasynda men ashqan kýrsqa 40 adam jazyldy. Osylaısha óz isimdi bastap kettim. Arada biraz ýaqyt ótkennen keıin EUÝ-dan «StartUp» jastar bıznes ınkýbatorynan maǵan tegin túrde bólme berildi», - deıdi Erbolat Alpysbaev.


Ózi bastaǵan iske úlken úmit artqan ol kásibiniń aıasyn keńeıtkisi kelgen. Osy jyldyń qańtar aıynda ol elordalyq ýnıversıtetterde «JDI» til úıretý mektebiniń úsh fılıalyn ashqan. Ókinishke qaraı, ómirdiń óz erejesi bar. Koronavırýs indetiniń órshýine baılanysty tótenshe jaǵdaı rejımi engizilgennen keıin bastaǵan isin toqtata turýyna týra kelgen.

«Karantın kezinde men shyǵynǵa battym: til ortalyǵy jabylyp, stýdentter jan-jaqqa ketip qaldy. Bos ýaqytym kóp bolǵandyqtan kitap jazyp, óz tájirıbemmen bólisýdi jón sanadym. Osyndaı qıyn kezeńde kóptegen adamnyń bastaǵan isi aıaqsyz qaldy. Ózimniń tájirıbem týraly nege jazbasqa degen oı týyndady. Sóıtip eki aı boıy til úıretý ortalyǵyn qalaı ashyp, qandaı qıyndyqtardy eńsergenim týraly oıymdy jınaqtadym. Óz oıymdy dosyma aıtyp, kitap barsha oqyrmanǵa paıdaly bolýy kerek degen sheshimge keldik. Óz oılaryn sátti júzege asyryp, ómirdiń ár salasynda kirpish bolyp qalanǵan tulǵalardan kómek suradyq. Oqyrmandarymyz osy kitaptaǵy keıipkerlerdiń ómir jolynan ózderine qajet bolatyn paıdaly aqparat alyp, kerek kezde olardyń tájirıbesin qoldana alýyn qaladyq», - deıdi jas keıipker.


Sportshylar Serik Sápıev, Ilıa Ilın, shahmatshy Dınara Sádýaqasova, rejısser Danııar Súndetbaev jáne basqa da tulǵalar ózderiniń ómirlik tájirıbesin bólisti.

Avtordyń oıynsha, kitaptyń ereksheligi – oqyrmandar jetistikke jetýdiń qupııasyn sóz júzinde emes, is júzinde jetistikke jetken tulǵalardyń aýzynan estıdi.

«Bul keıipkerler jetistikke óz kúshterimen jetken. Kedergi, qıyndyqtarǵa qaramastan – tek alǵa qaraı qadam basqan. Jetistikke jetkisi alatyn adamǵa qıyndyqtardan ótýge týra keledi, sol sebepti kitapty «Qıyndyqtardy eńserip, armanǵa jetý» dep atadym», - deıdi Erbolat Alpysbaev.

Bastapqyda ol 100 dana kitap shyǵarsa, onyń jartysy ótip ketken. Qazirgi ýaqytta ol osy kitaptyń taǵy 1 000 danasyn shyǵarýǵa nıetti. Kitaptyń túpnusqasy orys tilinde shyqqanmen, qazaq tildi oqyrmandar úshin qazaq tilindegi nusqasyn da shyǵarǵysy keledi.

«Kitapty qol astyńdaǵy qyzmetkerlermen qandaı qarym-qatynasta bolyp, ınvestorlarǵa óz jobańdy qalaı usyný kerektigi, qazaqstandyq startaperlerdiń qatelikteri nede bolǵany týraly aıtylady. Sondaı-aq, brend qalyptastyrý men neıromarketıng týraly da sóz qozǵadym. Ózimniń basymnan ótkergenniń bárin jazýǵa tyrystym. Maǵan jumys barysynda tájirıbe júzinde úırengen unaıdy: qatelik jiberseń jóndep, ary qaraı qadam basasyń. Kúızeliske túsip, eńseńdi túsirýdiń qajeti jo», - deıdi ol.


Jas kásipker ata-ananyń qoldaýy qanshalyqty mańyzdy ekenin aıtty. Shyn máninde ata-ananyń aq batasy men jyly sózine jeter eshteńe joq.

«Qıyndyqqa tap bolǵan kezde ata-anam qoldap, maǵan demeý bolady. Biz dastarhan basynda jınalyp, ıdeıalarymyz ben jańa jobalarymyzdy talqylaımyz. Tipti men bala bolǵan kúnniń ózinde olar meniń pikirimmen sanasatyn. Balańnyń qalaýyna qulaq túrip, onyń ne qalaıtynyn túsiný óte mańyzdy dep oılaımyn. bala úshin ata-ananyń qoldaýy árdaıym mańyzdy», - deıdi ol.

Erbolat Alpysbaev belsendi kásipkerlik qyzmeti úshin 2019 jyly «Jyldyń úzdik jas kásipkeri» syılyǵyn alǵan. Onyń aıtýynsha, jetistikke jetýdiń joly – qaıyrymdylyq jasaý.

«Men birinshi kýrs stýdenti bolyp júrgen kezimde qaıyrymdylyq jumystarymen aınalystym. «Qamqor» atty qaıyrymdylyq qoryn uıymdastyrdym. You Tube jelisi arqyly qarajat jınadyq. Qalaǵan adam bizdiń You Tube kanalymyzǵa kirip, onda bolyp jatqan jarnamanyń ústinen basady. Jarnama ár kirgeni úshin elektrondy ámııanymyzǵa qarajat aýdarylyp otyratyn. Jınalǵan qarajatty muqtaj janjarǵa berip otyrdyq. Elordalyq Amına esimdi kishkentaı qyzǵa kómektestik. Ol qan obyrymen aýyrǵan edi. Qoıandyda turatyn áleýmettik jaǵynan az qamtylǵan otbasynyń balalaryna qystyq kıim-keshek alyp berdik. Keıin bizdiń jobamyz buqaralyq aqparat quraldarynyń qyzyǵýshylyǵyn týdyrdy. «Nur Otan» partııasynyń jastar qanaty «Jas Otan» da bizge qoldaý bildirdi. Keıin biz qaıyrymdylyq jasaǵan balalar týraly beınerolık ashyq túrde kórsetilip jatqanyn kórdim de, «olardy mektepte mazaq etse qaıtemin?» dep oıladym. Olardyń janyn jaralaǵym kelmeı, bul isti toqtattym. Degenmen atalǵan qordyń belsendileri áli kúnge deıin muqtaj jandarǵa kómektesip turady», - deıdi Erbolat Alpysbaev.


Jas kásipkerdiń kóptegen jobasy qoǵamda talqylanyp jatady. Ol aǵylshyn tilin úırenem degenderge grant oınatyp, stýdenttik sharalarǵa demeýshilik jasaǵan.

«Til úıretý ortalyǵyndaǵy bir topta 8 adam oqýy kerek bolsa, kýrsqa 5 adam ǵana aqyly túrde qatysady, qalǵan 3 oryndy aqsha tóleýge múmkindigi joq stýdentterge arnaımyn. Ol úshin jetim nemese áleýmettik jaǵynan az qamtylǵan otbasydan shyqqan stýdentterdiń tizimin aldym. Olarǵa bizdiń ortalyqta tegin oqýǵa arnalǵan birneshe oryn bos turǵanyn aıttym. 5-6 stýdentti osy júıe boıynsha oqyttyq», - deıdi ol.

Jas kásipker qazirgi ýaqytta taǵy bir salada ózin synap kórgisi keledi.

«Men sharýa otbasynda dúnıege keldim. Burynnan aýyl sharýashylyǵymen aınalysqym keletin. QR aýyl sharýashylyǵy mınıstrliginiń enshiles kompanııasynda tájirıbeden ótip júrmin. Aýyl sharýashylyǵy salasyndaǵy ınnovatsııa salasynda tájirıbe jınap júrmin. Bolashaqta osy salada jumys istegim keledi», - deıdi Erbolat Alpysbaev.

Onyń aıtýynsha, jastarǵa memleket tarapynan kóp qoldaý kórsetiledi: jyl saıyn grant bólinip, sýbsıdııa usynylady. Osyndaı múmkindikterdi paıdalana bilý kerek.

«Meniń oıymsha, 20-30 jas aralyǵy – ómirdiń jaýapkershilikke toly kezeńi. Barlyq mańyzdy oqıǵalar osy kezeńde bolady: mektepten túlep ushyp, joǵary oqý ornyna oqýǵa túsemiz, jumysqa ornalasyp, otbasy quramyz. Dál osy kezeńdi bos ótkizip alýǵa bolmaıdy. Jastarda alǵa jeteleıtin arman bolýy kerek. Kitaptaǵy keıipkerlerdiń biri – rejısser Danııar Súndetbaev mynadaı qyzyq oıyn bólisken bolatyn: «Eger qazaqstandyqtardy Germanııaǵa, al nemisterdi Qazaqstanǵa kóshirse – eshteńe ózgermeıdi. Olar osy jaqta avtokólik shyǵaratyn zaýyt salsa, biz ol jaqta mal sharýashylyǵymen aınalysamyz. Bıik shyńdy baǵyndyrǵymyz kelse osy jerden, ózimizden bastaýymyz kerek». Men de onyń osy pikirimen kelisemin», - deıdi Erbolat Alpysbaev.


Bizdiń kanalymyzǵa jazylyńyz:

Bólisińiz:

Avtor:

Zarına Qaharman

Pikir qaldyrý
+7
Jiberý
ONLAIN QYZMETKERLER
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Erbol Janat
Erbol Janat
954-059
REDAKTOR
Aıdar Ospanalıev
Aıdar Ospanalıev
954-059

MURAǴAT