Jarylǵysh zat týraly jalǵan habar bergen SQO turǵyny ekinshi ret sottaldy
2022 jylǵy 27 mamyr 12:12

Jarylǵysh zat týraly jalǵan habar bergen SQO turǵyny ekinshi ret sottaldy

PETROPAVL. QazAqparat – Soltústik Qazaqstan oblysy Qııaly aýylynyń 58 jastaǵy turǵyny terrorızm aktisi týraly jalǵan habarlama bergeni úshin qylmystyq jaýapkershilikke tartyldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Aqqaıyń aýdany Qııaly aýylynyń 58 jastaǵy turǵyny 2,5 jylǵa bas bostandyǵynan aıyryldy. Ol byltyr jeltoqsan aıynda mas kúıde Tótenshe jaǵdaılar departamentine qońyraý shalyp, jarylǵysh zat qoıylǵany týraly habarlaǵan. Er adam jarylý qaýpi bar zat Petropavldaǵy kóp qabatty úılerdiń birine qoıylǵandyǵyn aıtqan. Saldarynan búkil arnaıy qyzmet «aıaǵynan tik turyp», birneshe saǵat bombany izdedi. Aqparattyń jalǵandyǵyna kóz jetkizip baryp, terrorızmge qarsy operatsııany doǵardy.

Oınaımyn dep ot basqan er adam bul áreketi úshin qylmystyq jaýapkershilikke tartyldy. Kúdikti birden anyqtalyp, Aqqaıyń aýdanynyń Qııaly aýylynda ustaldy. Buryn ol osyndaı qylmys jasaǵany úshin jazasyn ótegen, alaıda sabaq almaǵan.

«QR Qylmystyq kodeksiniń 273-baby - terrorızm aktisi týraly kórineý jalǵan habar taratqany úshin 5 jylǵa deıingi merzimge bas bostandyǵynan aıyrý túrindegi jaýapkershilik kózdelgen. Qylmystyń aldyn alý maqsatynda turaqty túrde túsindirý jumystary júrgiziledi», - deıdi SQO PD Ekstremızge qarsy is-qımyl basqarmasynyń bastyǵy Rýslan Jarasbaev.

Buǵan deıin Petropavl qalalyq soty oblys ortalyǵyndaǵy kóp qabatty úıge jarylǵysh zat qoıylǵandyǵy týraly habarlaǵan er adamdy bir jylǵa bas bostandyǵynan aıyrǵan edi.


Uqsas jańalyqtar

Jańalyqtar

MURAǴAT