Jappaı tártipsizdik: Ákimdik ǵımaratyna kirgen eki kópbalaly ana úıqamaqqa alyndy
2022 jylǵy 26 qańtar 14:03

Jappaı tártipsizdik: Ákimdik ǵımaratyna kirgen eki kópbalaly ana úıqamaqqa alyndy

QYZYLORDA. QazAqparat - Qyzylordada jappaı tártipsizdik kezinde búlik shyǵarǵan eki kópbalaly ananyń ústinen is qozǵaldy, dep habarlaıdy QazAqparat tilshisi.

Oblys ortalyǵynda 5 qańtar kúni jappaı tártipsizdik kezinde eki azamatsha búlikshilermen birge oblys ákimdiginiń ǵımaratyna basa kóktep kirip, tártipsizdikke oryn bergen. Vıdeojazbada olardyń tas laqtyryp, ákimdiktiń qorshaýyna minip, balaǵat sózder aıtqany, ǵımaratqa zańsyz kirgeni kórsetilgen.

Eki azamatshaǵa qatysty Sotqa deıingi tergep-tekserýdiń biryńǵaı tizilimine Qylmystyq kodekstiń 272-babynyń 2-bóligimen (jappaı tártipsizdikke qatysý) qylmystyq is tirkeldi. Fakti boıynsha jan-jaqty jáne obektıvti tergep-tekserý júrgizilgen.

Eki azamatsha qylmystyq áreketterin tolyq moıyndady. Olardyń asyraýynda kámeletke tolmaǵan balalarynyń bolýy jáne olardyń densaýlyq jaǵdaıy men ózderiniń ótinishi eskerilip, bultartpaý sharasy úıqamaqqa aýystyryldy.

Árbir derek muqııat zerdelenedi. Nátıjeleri boıynsha quqyqtyq baǵa beriletin bolady», - dep málim etti Qyzylorda qalalyq Polıtsııa basqarmasynyń baspasóz qyzmetinen.

Eske salsaq, búgin jappaı tártipsizdik kezinde uıaly telefon aksessýarlaryn urlaǵan qyzylordalyq ustalǵanyn jazǵan bolatynbyz.



Jańalyqtar

MURAǴAT