+7 (701) 759 90 19 Lenta
USD 386.70 EUR 427.15
RUB 6.06 CNY 54.57
Jańalyqtar

Jannet Ábish - 9 jasynda AQSh pen Japonııany moıyndatqan HHІ ǵasyr oıýshysy

2019 jylǵy 28 shilde 11:08
Bólisińiz:
Jannet Ábish - 9 jasynda AQSh pen Japonııany moıyndatqan HHІ ǵasyr oıýshysy

NUR-SULTAN. QazAqparat – Jannet qyl qalamyn qolyna qaıta alypty. 9 jasynda AQSh-ty, 11 jasynda Japonııany moıyndatqan sýretshi qazir elordada turyp jatyr.

Jańa ǵasyr oıýshysy



Ol ózin jıyrma birinshi ǵasyrdyń oıýshysymyn dep esepteıdi. Al keıbir ónertanýshylar onyń qylqalamynan sıýrrealızmniń izin kóredi. Eki ónerdiń qatysy qansha dep oılaýyńyz múmkin. Jannet Ábishtiń oǵan jaýaby daıyn.

«Qazaq tanymyna adamdy týra beınelep syzý jat. Tipti balbaldardyń ózi bir tıptes, naqty naqyshtalmaǵan bolyp keledi. Al bul kezde Batys realızmniń shyńyn baǵyndyryp jatqan edi. Qazaq óz oıyn sýret salyp áýrelenbeı-aq, oıý arqyly bildirgen. Oıýdyń jańaǵy realıstik sýretterden máni áldeqaıda tereń bolatyny sodan. Jalpy, qazaqtyń ulttyq bıi men oıýy tunyp turǵan fılosofııa ǵoı. Ón boıy tuspal. Ony túsinýge túısik tili, kórýge kókirek kózi kerek», - deıdi jas sýretshi.



Shym-shytyryq shımaı men battasqan boıaýlar áleminiń ókilinen mundaı sóz estımiz dep oılamaǵan edik. Salvador Dalıdi pir tutýy tıis keıipkerimiz qazaqtyń kesteshi áıelderin sýret óneriniń áýlıesi sanaıdy eken. Bul da biz kútpegen bir ǵajap dúnıe sekildi boldy!

«Bizdiń sheshelerimiz ben ájelerimiz shetinen kesteshi, ismer bolǵanyn bilesiz. Oıý-órnek syzý olar úshin kúndelikti turmys sanalatyn. Al sol oıýlarǵa qarap oılanyp kórdińiz be? Otaǵasyna degen ińkárligi de, tórkinine degen saǵynyshy da, balasyna degen tileýqor mahabbaty da sol oıýlarda saırap tur ǵoı, shirkin! Túskıizder men syrmaqtarǵa qarap jatyp, sol ájelerimdi aıaımyn, keıde. Qanshama syrshyl sýret ıeleri ishten tynyp, bar ónerin oıýǵa salyp óte bergen?! Men sýretshi retinde óz bastaýymdy sol oıýlardan aldym», - deıdi Jannet.

Jannet Ábish esimdi sýretshiniń bar ekenin álem 2001 jyly bilgen bolatyn. Nıý-Iorkte ótken «Bolashaq balalardyń kózimen atty» atty halyqaralyq konkýrsta ol birinshi oryn aldy. Eki jyldan keıin Japonııada Azııa elderiniń jas sýretshiler arasyndaǵy baıqaýda Jannet bas júldeni qanjyǵasyna baılady.

Oıynǵa qumartpaı, oıýǵa telmirgen qarakóz qandasynyń talantyn baıqap, ony úlken ónerge baýlyǵan Janathan Saǵıdan edi. Mońǵolııa astanasynda erekshe úıirme ashyp, jastardyń talantyn óz tanymy boıynsha ushtaǵan sýretshini bergi jaqtaǵy biz bilmegenimizben, ol jaqtyń qazaqtary maqtan etedi. Qazir onyń qos uly ákeniń izin jalǵap, Azııaǵa tanymal sýretshi atanyp júr. Osyndaı ortadan shyqqan qazaq qyzynyń kóshpeli órkenıettiń ýyzyna jaryp ósýi zańdylyq ta shyǵar.



2006 jyly ol halyqaralyq «Shabyt» konkýrsynyń gran-prı júldegeri atanyp, elordada «Oıý tús» degen atpen kórme ótkizdi. Eldegi tanymal sýretshilerdiń qarshadaı Jannetke nazary aýatyny da osy tus. Al 2008 jyly «Daryn» memlekettik jastar syılyǵynyń laýreaty atanǵan eń jas sýretshi bolyp tirkeldi.

Mektep bitirgen soń Jannetti T.Júrgenov atyndaǵy Qazaq Ulttyq Óner akademııasy qushaq jaıa qarsy aldy. Roza Ábenova, Baıan Barmanqulova, Kamılla Lı sııaqty otandyq ónertanýshylar biraýyzdan «fenomen» dep baǵalasa, maıtalman sýretshi aǵalary áli kúnge deıin jol nusqap, qamqorlyq tanytyp keledi. Oqý bitirgennen keıin Jannet rejısserlikke de bet burdy. Arasynda dekoratıvti keskindeme men dızaınerlikke de ýaqyt taýyp júr.



Qazaq bıleriniń ózi aıtqan qupııasyn ashý úshin «Qazaqstan» ulttyq arnasynda kóp serııaly derekti toptama túsirdi. «Óner shejiresi» atty 15 serııaly jumysy da kórermenniń kóńilinen shyqty. Qazaqtyń baı álemin zamandastaryna túsinikti tilmen kórsetý úshin túrli tásilderdi paıdalanyp, ondaǵan fılm men rolıkter túsirdi.

Ózin kóshpeli órkenıettiń úzigi sanaıtyn zamanaýı sýretshiniń týyndylaryna kóz tastap kórdik. Oıymyz – tylsym týyndylardan qazaq oıýyna uqsastyq tabý edi.



«Bul sýretti 14 jasymda syzyppyn. Atyn «Máńgilik másele» dep qoıǵanmyn. Anyqtap qarasańyz, oıýǵa uqsas qyzyl qusty qushaǵymen qorǵashtap, kókke umtylǵan er adamdy kóresiz. Onyń aıaq jaǵynda buzaý qushaqtaǵan áıel bar. Qyzyl qus maqsat pen múddeniń sımvoly retinde alynǵan. Al sıyr – úıdegi bereke men molshylyqtyń belgisi. Mundaı tartys ár januıada bolyp jatyr. Onyń qashan bastalǵanyn, qashan aıaqtalatynyn eshkim bilmeıdi. Sondyqtan da bul – Máńgilik másele», - deıdi kúlip ol.

Kishkene syrmaqtyń ústinde ebedeısiz otyrǵan alyp deneli usqynsyz adamnyń sulbasyna kózim tústi. Týyndynyń aty «Jalǵyzdyq» eken.



«Qarańyz, myna adam baıaǵyda-aq eseıip ketken. Al astyndaǵy syrmaq – onyń komfort aıasy. Bul aıa ózine tarlyq etetinin bilse de, shyqqysy kelmeıdi. Onyń syrtynda sary tústi keńistik qorshap tur. Bul tús men úshin dabyldyń, eskertýdiń, syn-qaterdiń sımvoly. Syrmaq ústindegi pendeniń kózine aınalasy osylaı kórinip tur», - deıdi sýretshi.

Sheteldik áriptesteri Jannettiń qanyq tústerdi meılinshe batyl úılestire alatynyn erekshe baǵalaıtyn kórinedi. Tipti sonyń qupııasyn suraǵandar da bolypty.

«Onyń qupııasy meniń balalyq shaǵymda jatyr. Qazaq oıýlarynyń kúńgirt túspen boıalǵan kezin kórdińiz be? Jalpy qazaq álemi tutas qanyq boıaýdan turady ǵoı. Sonyń bári meniń jadyma sábı kúnimde kod bolyp engen sııaqty», - deıdi Jannet.

Ol bizge buǵan deıin talaı kórmeniń kórkin ashqan týyndylaryn ǵana kórsetti.



Kúzde «Adam» degen taqyryppen jańa kórme ótkizbekshi eken. Tyń týyndylaryn kórmege deıin syrt kózden tasada ustaımyn dep sheshse kerek. Qııalshyl búldirshinniń oıýshy boıjetkenge aınalǵan shaǵyndaǵy sýretterin kórý úshin kúzgi kórmede jolyǵýǵa ýaǵdalastyq. Sol úshin kúzdi asyǵa kútemiz!

Bizdiń kanalymyzǵa jazylyńyz:

Basty sózder: Mádenıet, Óner,
Bólisińiz:

Avtor:

Esimjan Naqtybaı

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Jarylqasyn Saıagúl
Jarylqasyn Saıagúl
954-059

MURAǴAT