Janarbek Áshimjanov: Ulttyq quryltaı - qoǵamdyq kúsh
2022 jylǵy 24 maýsym 09:20

Janarbek Áshimjanov: Ulttyq quryltaı - qoǵamdyq kúsh

NUR-SULTAN. QazAqparat – Ulytaý tórinde ótken Ulttyq quryltaıdyń alǵashqy otyrysynda elimizdiń qundylyqtaryna negizdelgen memlekettiń damý joly týraly usynystar aıtyldy. Osy oraıda quryltaıdyń aldaǵy jospary men onyń atqaratyn jumystary týraly QR Parlamenti Májilisiniń depýtaty, Ulttyq quryltaı múshesi Janarbek Áshimjanov pikir bildirdi, dep habarlaıdy QazAqparat tilshisi.

Quryltaı múshesiniń aıtýynsha, atalǵan konsýltatıvtik keńes aldaǵy ýaqytta jastar saıasatyna asa den qoıady. Depýtat 30 jylda osy baǵyttaǵy elimizdiń jetken jetistikteri men kemshil túsken tustaryna taldaý jasalyp, bolshaq jol aıqyndalatynyn málim etti.

«Meniń oı-kózqarasym bizdiń ult retinde damýymyzǵa keri áserin tıgizip turǵan túıtkildi máseleler bar. Birinshi kezekte – ol jastar saıasaty. Sosyn ulttyq rýhty kóteretin jobalardy júzege asyrý. Endi osy baǵyttaǵy dúnıelerdi arnaıy jumys toby nazarǵa aldy. Sonymen qatar ol alańda negizinen ulttyq baǵyttaǵy dúnıelerge kóńil bólinedi. El men halyqtyń 30 jyldaǵy kemshiligi men jetistigi bar. Qaı jerde bizden kinárát ketti, qaı jerde barmaq shaınaıtyn jaǵdaılarǵa jol berip aldyq, degen túıtkilder talqylanyp jatyr. Bul búgingi Táýelsizdik dáýirinde qalyptasqan jastarymyz ben zamandastarymyzdyń memleketimizge tıgizer paıdasyn tolyq sezinýin qamtamasyz etetin jıyn dep oılaımyn», - dedi depýtat.

Janarbek Sadyqanuly Ulttyq quryltaıda syrtqy saıasatqa qatysty máselelerdiń talqylanýy mindetti emes ekenin basa aıtty. Onyń pikirinshe, bul alańda memlekettiń ishki turaqtylyǵyna qatysty sharalar qolǵa alynýy kerek.

«Máselen, ulttyq kıno jáne mádenıet – kenje qalyp jatqan tustarymyz osy ǵoı. Al bilim, densaýlyq salalaryna qatysty ózderiniń arnaıy baǵdarlamalary bar. Sol arqyly olar kezeń-kezeńimen jumysyn isteı beredi. Al Úkimet pen qoǵam ony baqylap otyrýy kerek. Sondyqtan Ulttyq quryltaı birinshi kezekte halqymyzdyń belgili bir ıdeologııasyn qalyptastyryp, sony qamtamasyz etetin alań bolsa degen usynysym bar», - deıdi Janarbek Áshimjanov.

Sonymen qatar, depýtat Respýblıka kúnine ulttyq mereke mártebesin qaıtarý usynysyna, meıramnyń tarıhı mańyzyna toqtaldy.

«Rasynda 25 qazan Táýelsizdiktiń deklaratsııasyna jasalǵan alǵashqy qadam. Sondyqtan bul kún ataýsyz qalmaýy kerek. Onyń resmı merekeler qataryna engizilýi - durys sheshim. Al jeltoqsandaǵy merekemiz bizdiń el bolý jolynda ter tókken ulttyq batyrlarymyzdy, saıası qaıratkerlerdi jáne rýhanı tulǵalarymyzdy ulyqtaý maqsatyndaǵy sımvoldyq mereke mártebesinde qalýy kerek. 25 qazan Respýblıka kúni Táýelsizdiktiń alǵashqy jyldary táp-táýir, eldiń eńsesin kótergen jaqsy mereke bolǵan. Keıin ol máninen aıyryldy ǵoı. Sondyqtan bul tarıhı ádildikti qalpyna keltirý prıntspterin oryndaý baǵytyndaǵy jumystardyń biri. Bul – merekeler qataryn kóbeıtken emes. Atalǵan usynysty halyq durys qabyldaıdy, ulyqtaıdy jáne onyń qadir-qasıetine jetý jolynda jastar sanasyna sińiredi degen senimdemin», - dep túıindedi Ulttyq quryltaı múshesi.

Janarbek Sadyqanuly Ulttyq quryltaı ár salany qamtyǵan qoǵamdyq kúsh bolatynyna senim bildirdi. Onyń sózinshe, atalǵan konsýltatıvtik keńes Úkimetke, qoǵamǵa jáne zań shyǵarýshy organǵa tıisti deńgeıde yqpalyn júrgize alatyn quzyretke ıe.


Sondaı-aq... oqyńyz

Jańalyqtar

Úrdis

MURAǴAT