Jańalyqtar  >
  Úrdis

Janarbek Áshimjan: Aqparattyq shekarany qorǵaý – ortaq mindetimiz

2022 jylǵy 28 qyrkúıek, 17:55
Janarbek Áshimjan: Aqparattyq shekarany qorǵaý – ortaq mindetimiz

Ózderińizge málim, sońǵy kezderi ómirimizge dendep engen jańa medıa, túrli áleýmettik jelilerde buqarany joldan taıdyrýǵa baǵyttalǵan jalǵan aqparattar tasqyny jıilep ketti. Túrli blogerler men esim-soıyn jasyrǵan ártúrli akaýnttar, jeń ushynan jalǵasqan bottar eldiń tynyshyn qashyryp, alaýyzdyqtyń shoǵyn úrleýge jol berýde. Jalǵan málimetter taratyp, eldiń qulaǵyn kóterip, memlekettiń ishki turaqtylyǵyn shaıqaltýǵa múddeli teris pıǵyldylar da joq emes.

Qazir búkil dúnıe ottan kóılek kıip tur. Kúni keshe el Prezıdenti Qasym-Jomart Kemeluly «Bizge syrtqy jaý da, ishki alaýyzdyq ta kerek emes, bizdiń baǵytymyz birlik pen turaqtylyq» dep kesip aıtty. Táýelsiz Qazaq eliniń qoǵamdyq-saıası ómirinde aqparattyq jaýapkershiliktiń salmaǵy árqaısymyzdy tereń oılandyrý kerek.

Ásirese, mıllıondaǵan jazylýshysy bar blogerler men ınternet resýrstar jetekshileriniń memleketshildik jaýapkershiligi mańyzdy. El ishin ala taıdaı búldirip, bólshekteýge, alaýyzdyqty qozdyrýǵa, jalǵan aqparat taratýǵa jasalǵan árbir qadamǵa quqyqtyq turǵydan qatań baǵa berilý kerek. Mundaı feık aqparattar birinshi kezekte qoǵamdy turaqsyzdandyryp, janjaldy arttyryp, memlekettik apparattyń qalypty jumys yrǵaǵyn buzýǵa, eldiń tynyshyn qashyrýǵa baǵyttalatyny daýsyz.

Otandyq aqparattyq óriske shabýyldy uıymdastyrý mehanızmin tıptik dep aıtýǵa bolady. Negizinen jalǵan aqparattar eń aldymen túbi kúmándi resýrstarda paıda bolady, olar negizinen elden tys jerlerde ornalasqan. Іle-shala feıkter barlyq aqparattyq pablıkterde jáne blogerler men anonımdi telegram-arnalar arqyly jańa medıada kórsetiledi.

Ókinishtisi, feık aqparattardy «taratý» protsesine qarapaıym jeli qoldanýshy azamattar da senip qalýda. «Jańalyqty» alǵannan keıin olar ony birden týystarymen, tanystarymen bólisedi, nátıjesinde qoǵam turaqtylyǵyn buzýǵa jasalǵan teris áreketterdiń qatysýshysy ekenin sezinbeıdi. Sondyqtan biz otandastarymyzdy jalǵan aqparattardan saqtandyrýymyz kerek.

Mynadaı qym-qıǵash kezeńde saıasattanýshylardyń, blogerlerdiń, jýrnalısterdiń, túrli saladaǵy kósh bastaýshy azamattardyń birinshi kezekte memlekettilikke, el Táýelsizdiginiń erteńine degen jaýapkershiligi asa mańyzdy. Osy sebepti, eldegi aqparattyq keńistiktiń shynaıylyǵyn, ádilettiligin, tazalyǵyn turaqtandyrý úshin mynadaı qadamdar jasaý qajet dep sanaımyz:

Birinshi, ýákiletti organdar kez kelgen máselege sátinde quqyqtyq baǵa berip, qoǵamdy, eldi shynaıy aqparattarmen qamtamasyz etý kerek. Sonymen qatar, zamanaýı tehnologııalar úshin túbi shıki, shetten qarjylyq qoldaý alatyn anonımderdiń jeke basyn anyqtap, arandatýshylardyń is-áreketine ashyq túrde baǵa berý qajet. Ekinshi, memlekettik organdar aqparat beredi, biraq onyń jıiligi, eń bastysy taralý jyldamdyǵy joǵaryda sıpattalǵan shemamen salystyrýǵa kelmeıdi. Sondyqtan el Táýelsizdigi men memlekettiń turaqtylyǵyn, aqparattyq qaýipsizdikti qamtamasyz etetin BAQ-tardyń jumysyn kásibı deńgeıde uıymdastyrý kerek.

Bizdiń qoǵamǵa áser etetin aqparattyq soqqylardyń kúshin baǵalamaý – úlken qatelik. Bizdiń ortaq mindetimiz – aqparattyq shekarany qorǵaý, elimizde beıbitshilik pen turaqtylyqty saqtaý.


Foto: 7kun.kz

Tegı:
Sondaı-aq... oqyńyz
Seriktester jańalyqtary

Jańalyqtar