Jańaózennen Qostanaıǵa kóshetin 130 otbasyn taba almaı otyrmyz – Noǵaev
2022 jylǵy 30 maýsym 12:58

Jańaózennen Qostanaıǵa kóshetin 130 otbasyn taba almaı otyrmyz – Noǵaev

NUR-SULTAN. QazAqparat – Jańaózenniń halqy soltústik óńirlerge kóshýge qulyqsyz. Mańǵystaý oblysynyń ákimi Nurlan Noǵaev ortalyq kommýnıkatsııalar qyzmetinde osyndaı málimet aıtty, dep habarlaıdy QazAqparat tilshisi.

«Jańaózen qalasynyń myńdaǵan halyqty asyraý, laıyqty jalaqymen qamtamasyz etýge shamasy jetpeıtini týraly ýájder bar. Qala turǵyndary soltústik óńirlerge kóshýge qalaı qaraıdy? Arnaıy baǵdarlama jasap, tıimdi joldar usyný mehanızmderin qarastyryp jatyrsyzdar ma?», - dep surady jýrnalıst brıfıngide.

«Negizi Jańaózen qalasy kezinde osy attas ken ornynyń janyndaǵy vahtalyq kent retinde uıymdastyrylǵan eldi meken bolatyn. Ol jerde jospar boıynsha Jańaózen kenishi men mańyndaǵy ken oryndaryn ıgerý úshin ary ketse, 60-70 myń adam turýy kerek. Qazirgi tańda Jańaózen qalasynda, qasyndaǵy eldi mekenderde 160 myńnan astam adam turady», -dedi Nurlan Noǵaev.

Aıtýynsha, qazir munda ınfraqurylymdy, jylý, elektr jaryǵyn jetkizý máseleleri, árıne, birtindep sheshilip kele jatyr. Degenmen, qaladaǵy halyqtyń bir bóligin eńbek kúshi tapshy óńirlerge kóshirý máselesi áli de ózekti.

«Siz aıtqandaı, eńbek qoly azdaý jerlerge kóshirý jumystary júrip jatyr. Óz tarapymnan osy múmkindikti paıdalanyp, atalǵan máselege alańdaıtyn azamat retinde ózińizden, ǵalymdardan, sarapshylardan utymdy usynystar túsip jatsa, qaraýǵa ázir ekenimdi aıtqym keledi.

Soltústikke kóshkisi keletin azamattardyń kádimgideı nópiri bar dep aıta almaımyn. Sebebi Jańaózende tabıǵat jyly. Ol jerdegi turmystyq jaǵdaı, keıbireýleriniń jalaqysy az bolǵanymen aǵaıyn-týyspen toptasyp turýdy ádetke aınaldyrǵan adamdar kóp. Jańaózendegi 160 myń adamnyń 80 paıyzy elimizge kelgen qandastardan quralǵan. Meniń oıymsha, psıhologııalyq senim bolý úshin jáne buryn kóship kelgen memleketterinde toptasyp ómir súrýge beıimdelip qalǵandyqtan bir-birine qoldaý bolamyz degen túsinikpen alysqa ajyrap ketkisi kelmeıtin sııaqty», - dedi oblys ákimi.

Sondaı-aq, ol qazir jańaózendikterdi ózge óńirlerge kóshirý jumystaryna qoǵam belsendileri men qoǵamdyq uıymdar aınalysyp jatqanyn atady.

«Bul bir kúndik sharýa emes. Mysaly, Jańaózende bir kásipker Qostanaı oblysyndaǵy 30 eldi mekenge 130 otbasy kóshirip aparǵysy keletinin aıtyp, usynys qoıdy. Sol jaqta jeri bar eken. «Aldylaryna mal salyp bereıin. 7 jylǵa deıin eshqandaı qaıtarym talap etpeımin. Úı bereıin, sol jerde turyp jumys istesin» degen shartyn qoıdy. Sol 100 adamdy taba almaı otyrmyz.

Soltústikke kóshirý jónindegi memlekettik baǵdarlama kezinde Mańǵystaýdy da qamtydy. Ol jerge barǵan azamattardyń birazy qalyp, birazy keri qaıtty. Aýa raıynyń qolaısyzdyǵy, qystyń sýyqtyǵy, gazdyń joq bolýy jaqpaǵan», - deıdi aımaq basshysy.

Eske salsaq, keshe QR Májilis depýtaty Edil Jańbyrshın Úkimet basshysy Álıhan Smaıylovtyń atyna Mańǵystaý oblysyndaǵy eńbek daýlary týraly saýal joldadǵan edi.



Jańalyqtar

Úrdis

MURAǴAT