Jańaózende ákimdik qyzmetkeri mas kúıinde kólik júrgizgen

AQTAÝ. QazAqparat – Mańǵystaý oblysy Jańaózen qalasy ákimdiginiń laýazymdy qyzmetkeri mas kúıinde kólik júrgizip, jol saqshylaryna ustalǵan, dep habarlaıdy QazAqparat tilshisi.

Oǵan qatysty is ádep keńesinde qaraldy. QR Memlekettik qyzmet isteri agenttiginiń Mańǵystaý oblysy boıynsha departamentiniń mamany Ahat Dalabaevtyń aıtýynsha, memlekettik qyzmetshi Q. Gafarov jeke avtokóligimen kele jatqanda Jańaózen qalasynda polıtsııa qyzmetkerleri toqtatqan. Ol polıtseılerdiń belgilengen tártipke sáıkes alkogoldik masań kúıin anyqtaý týraly talabyn oryndamaǵan. Biraq óziniń mas ekenin moıyndaǵan. Bul is ádep kodeksiniń talabyn buzdy dep keńeske jiberildi.

«QR Memlekettik qyzmet isteri agenttigi arqyly QR Bas prokýratýrasynyń memlekettik qyzmetshiler men ákimshilik jaýapkershilikke tartylǵandar boıynsha júrgizilgen monıtorıng nátıjesi kelip tústi. Atalǵan monıtorıngti taldaý barysynda Jańaózen qalalyq qurylys bóliminiń basshysy Qanatbek Gafarov Jańaózen qalalyq mamandandyrylǵan ákimshilik sotynyń qaýlysyna sáıkes kólik júrgizý quqyǵynan aıyrylǵan»,-dedi Ahat Dalabaev.

Keńes músheleri Ádep kodeksiniń talaptary buzyldy dep taýyp, oǵan «qatań sógis» túrindegi tártiptik jaza qoldaný týraly sheshim qabyldady.