Jańa Sý kodeksiniń jobasy 2023 jyly Parlamentke engiziledi
2022 jylǵy 14 sáýir 14:38

Jańa Sý kodeksiniń jobasy 2023 jyly Parlamentke engiziledi

NUR-SULTAN. QazAqparat – Jańa Sý kodeksin ázirleý boıynsha jumys bastaldy. Bul týraly QR Ekologııa, geologııa jáne tabıǵı resrýstar mınıstri Serikqalı Brekeshev aıtty, dep habarlaıdy QazAqparat tilshisi.

«Ózderińiz biletindeı, Prezıdenttiń sý qaýipsizdigin qamtamasyz etý jónindegi tapsyrmasyn oryndaý úshin mınıstrlik sýarý júıelerin qaıta qurý jáne jańǵyrtý, sý únemdeýdi yntalandyrý esebinen sýǵa suranysty retteý arqyly sý resýrstaryn paıdalanýdyń tıimdiligin arttyrý boıynsha júıeli sharalar qabyldap jatyr. Óz kezeginde, bul is-sharalardyń tıimdi iske asyrylýyn qamtamasyz etý úshin zańnamalyq ózgerister qajet. Búgingi tańda, mınıstrlik tarapynan jańa Sý kodeksin ázirleý boıynsha jumys bastaldy, onyń jobasy 2023 jyldyń birinshi jartysynda Parlamentke engiziletin bolady», - dedi Serikqalı Brekeshev Senattyń jalpy otyrysynda.

Onyń aıtýynsha, sý salasyn damytý perspektıvalaryn bıylǵy mamyr aıynda ótetin parlamenttik tyńdaýlarda qaraý josparlanyp otyr. Oǵan Senat depýtattary da qatysyp, óz usynystarymen bólisedi.

Budan buryn habarlanǵandaı, Serikqalı Brekeshev gıdrotehnıkalyq qurylystardyń qaýipsizdigine qatysty jeke zań ázirlenetinin aıtty.

Bıyl aqpan aıynda QR Prezıdenti Qasym-Jomart Toqaev Úkimetke klımattyń ózgerýi men shekaralas elderdiń saıasatyn eskeretin jańa Sý kodeksin ázirleýdi tapsyrdy.


Seriktester jańalyqtary

Jańalyqtar

Úrdis

MURAǴAT