+7 (701) 759 90 19
USD 426.14 EUR 497.05
RUB 6.02 CNY 66.69
Jańalyqtar

Jańa quramdaǵy Májilis: Palatanyń eki komıtetin parlamenttik oppozıtsııa ókilderi basqarady

2021 jylǵy 15 qańtar 16:28
Bólisińiz:
Jańa quramdaǵy Májilis: Palatanyń eki komıtetin parlamenttik oppozıtsııa ókilderi basqarady

NUR-SULTAN. QazAqparat – Búgin QR Prezıdenti Qasym-Jomart Toqaev 7-shi shaqyrylǵan Parlamenttiń 1-shi sessııasyn ashty. Memleket basshysy quramy jańǵyrǵan jańa Májilistiń qyzmetke kirisýi elimiz úshin sımvoldyq máni bar eki oqıǵamen tuspa-tus kelip otyrǵanyn atap ótti. Ol – el Táýelsizdiginiń 30 jyldyq mereıtoıy men qazirgi zamanǵy Qazaqstan parlamentarızminiń shırek ǵasyrlyq beleske jetkeni. Memleket basshysy osy tarıhı kezeńde senim mandatyna ıe bolǵan depýtattar halyq úmitin aqtap, Otanymyzǵa adal qyzmet etetinine senim bildirdi.

«Táýelsizdiktiń 30 jyldyǵynda keshendi reformalar júrgiziletin bolady. Barlyq kúsh-jigerimizdi tıimdi memleket pen ádiletti qoǵam qurýǵa jumyldyrýymyz kerek. Basty basymdyq – halyqtyń turmys sapasyn jaqsartyp, ál-aýqatyn arttyrý. Jurt jasandy jetistikterdi emes, kózben kórip, qolmen ustaıtyn naqty nátıjeni kútedi. Halyq ekonomıkalyq jáne áleýmettik baǵdarlamalardyń jemisti bolǵanyn qalaıdy. Biz osy maqsattaǵy aýqymdy jumystarǵa barlyq belsendi azamattardy tartamyz», – dedi Qasym-Jomart Toqaev.

Qasym-Jomart Toqaev kózdegen maqsatqa jetý úshin barlyq salalarda dáıekti ózgerister jasalatynyn, ol úshin qandaı basymdyqtarǵa mán berýimiz qajet ekenin aıtty. Qazaqstan Prezıdentiniń aıtýynsha, eń aldymen, quqyqtyq memleketti damytýǵa jáne azamattardyń bılik organdaryna senimin nyǵaıtýǵa kúsh salý kerek.

Prezıdent ekinshi basymdyq retinde kúshti jáne ınklıýzıvti qoǵam qurýdyń negizgi quraly tıimdi áleýmettik saıasat ekenin aıtty. Sonymen qatar álem «bilim ekonomıkasyna» qaraı jyljyp bara jatqanyn atap ótti.

Úshinshiden, Ulttyq ekonomıka turaqty damymaı, halyqtyń ál-aýqatyn arttyrý múmkin emes. Prezıdent belgilegen basymdyqtyń biri osy. Memleket basshysy Úkimetke ekonomıkalyq belsendilikti qoldaýǵa baǵyttalǵan kontrtsıkldy makroekonomıkalyq saıasatty jalǵastyrýdy tapsyrdy.

Tórtinshi basymdyq aýmaq pen keńistik turǵysynan elimizdiń teńgerimdi damýyna arnalǵan. Bul rette barlyq óńirlerdi birtutas ekonomıkalyq keńistik arqyly baılanystyratyn asa mańyzdy salalardy damytýǵa basa nazar aýdarylady.

Besinshiden, Qazaqstandaǵy reformalardyń basty baǵytynyń biri – saıası jańǵyrý. Prezıdent bıyl jekelegen aýyldyq okrýgterde saılaý ótetinin málimdedi.

Memleket basshysy altynshy basymdyq turǵysynda azamattyq qoǵam ókilderiniń belsendiligin arttyrý, jastar saıasatyn jetildirý jáne qaıyrymdylyq qyzmetin qoldaý máselelerin de udaıy nazarda ustaý qajettigin aıtty.

Budan bólek adam quqyqtaryn tolyq qorǵaý memlekettiń basty maqsatynyń biri bolyp qala beretinin atap ótti. Bul rette, azamattardyń tańdaý erkindigin barynsha qamtamasyz etý óte mańyzdy.

VII saılanǵan Parlamenttiń alǵashqy jalpy otyrysy

Elde sońǵy úsh aıǵa sozylǵan saılaý naýqany aıaqtalyp, jańadan saılanǵan Parlament Májilisiniń depýtattary anyqtaldy. Osy oraıda Parlament Májilisinde VII saılanǵan Parlamenttiń alǵashqy jalpy otyrysynda depýtattar ant berip, qyzmetterine kiristi.

Zańnamaǵa sáıkes, otyrys barysynda depýtattar aldymen Májilistiń jańa tóraǵasyn jasyryn daýys arqyly saılaýǵa kiristi. Bul kandıdatýraǵa Nurlan Nyǵmatýlın usynyldy. Osy oraıda onyń kandıdatýrasy jasyryn daýys berý bıýlletenine engizildi.

Aıta keterligi, saılaýǵa qatysty jasyryn daýystardy sanaý úshin jeti depýtattan turatyn sanaq komıssııasy qurylǵan bolatyn. QR Konstıtýtsııasyna sáıkes, QR Parlamenti Májilisiniń tóraǵasy memlekettik tildi erkin meńgergen, Májilis depýtattarynyń arasynan palata depýtattary jalpy sanynyń kópshilik daýysymen jasyryn daýys berý arqyly saılanady. Májilis tóraǵasynyń qyzmetine kandıdatýrany palata depýtattary usynady.

Jasyryn daýys úshin Májilis holynda arnaıy kabınalar jabdyqtalyp, saılaý jáshigi ornatylǵan. Daýystardy sanaý úshin Esep komıssııasy jasaqtalyp, onyń tóraǵasy - Májilis depýtaty Muhtar Erman, hatshysy - Aıgúl Nurkına boldy.

Daýys berý nátıjesi boıynsha depýtattar atalǵan kandıdatýraǵa qoldaý bildirdi.

«Eń aldymen, meni taǵy da osy joǵary laýazymdy qyzmetke - Májilis tóraǵasy retinde saılaǵandaryń úshin shyn júrekten alǵysymdy bildirýge ruqsat etińizder! Birinshiden, bul men úshin óte úlken jaýapkershilik. Sondyqtan da árqashan Elbasymyz Nursultan Nazarbaevtyń, Prezıdent Qasym-Jomart Toqaevtyń ózime júktegen mindetterin joǵary deńgeıde oryndaý úshin, sizderdiń jáne bizdiń saılaýshylardyń senimin aqtaý úshin barlyq jınaǵan bilimimdi, tájirıbemdi jumsaıtyn bolamyn», - dedi Májilis tóraǵasy bolyp saılanǵan Nurlan Nyǵmatýlın.

Eske sala keteıik, 14 qańtarda Elbasy Nursultan Nazarbaev «Nur Otan» partııasy fraktsııasynyń otyrysynda Parlament Májilisindegi partııa fraktsııasynyń jetekshisi qyzmetine Nurlan Nyǵmatýlınniń kandıdatýrasyn usyndy. Fraktsııa depýtattary Elbasynyń usynysyn biraýyzdan qoldady. Sondaı-aq, Májilis spıkeri laýazymyna Nurlan Nyǵmatýlınnyń kandıdatýrasyn usyný máselesi de qaraldy.

Májilistegi ózge de laýazymdar...

Búgin jalpy otyrys barysynda QR Parlamenti Májilisi tóraǵasynyń orynbasarlary laýazymyna Pavel Kazantsev pen Balaıym Kesebaeva saılandy.

«Balaıym Týǵanbaıqyzy 6-shy shaqyrylym depýtaty bolǵan, tájiriıbesi mol bilikti zańger. Kóp jyldar boıy ádilet organdarynda qyzmet atqardy. 6-shy shaqyrylymda Zańnama jáne sot-quqyqtyq reforma komıtetiniń múshesi boldy. Zań shyǵarý qyzmetine belsendi qatysyp, óziniń kásibı sheberligin kórsetti», - dedi Májilis tóraǵasy.

Nurlan Nyǵmatýlın ekinshi orynbasary Pavel Kazantsevtiń jergilikti atqarýshy organdarda jumys tájirıbesi mol ekendigin, 6-shy shaqyrylǵan Parlament Májilisiniń depýtaty bolǵanyn atap ótti.

Aıtpaqshy, QR Parlamenti Májilisiniń 2 komıtetin parlamenttik oppozıtsııa ókili basqaratyn boldy. QR Parlamentiniń komıtetteri men komıssııalary týraly zańnyń 7-babyna sáıkes, palata turaqty komıtetteriniń tóraǵalary Májilis otyrysynda ashyq nemese jasyryn daýys berý arqyly palata depýtattary jalpy sanynyń daýysymen saılanady.

Osy rette depýtat Álııa Saparova komıtet tóraǵalaryn ashyq daýys berýdi usynyp, qoldaý tapty.

«Parlamenttik oppozıtsııa máseleleri boıynsha qabyldanǵan zańnamaǵa sáıkes, Májilistiń kem degende bir turaqty komıtetiniń tóraǵasy parlamenttik oppozıtsııadan saılanady. Sonymen qatar parlamenttik oppozıtsııa basqa da turaqty komıtetterdiń tóraǵalary laýazymyna kandıdat usyna alady. Búgingi jalpy otyrysqa deıin parlamenttik kópshilik jáne parlamenttik oppozıtsııaǵa kiretin partııalar fraktsııalarynyń basshylarymen tıisti keńester ótti. Keńes barysynda kelisilgen sheshimge sáıkes, Májilistiń 2 komıteti - Agrarlyq máseleler («Aq jol» Qazaqstannyń demokratııalyq partııasy) men Ekologııa máseleleri jáne tabıǵatty paıdalaný komıtetteriniń (Qazaqstan halyq partııasy) tóraǵalary parlamenttik oppozıtsııadan usynylady. Al qalǵan 5 komıtet tóraǵalary parlamenttik kópshilikten, ıaǵnı «Nur Otan» partııasy fraktsııasynan saılanady», - dedi Májilis tóraǵasy.

Sonymen Nurlan Nyǵmatýlınniń usynysymen:

- Agrarlyq máseleler komıtetine parlamenttik oppozıtsııadan Erlan Barlybaev, («Aq jol» Qazaqstannyń demokratııalyq partııasy)

- Áleýmettik-mádenı damý komıtetine Jámıla Nurmanbetova,

- Zańnama jáne sot-quqyqtyq reforma komıtetine Qanat Mýsın,

- Halyqaralyq ister, qorǵanys jáne qaýipsizdik komıtetine Aıgúl Quspan,

- Qarjy jáne bıýdjet komıtetine Marat Qusaıynov,

- Ekonomıkalyq reforma jáne óńirlik damý komıtetine Albert Raý,

- Ekologııa máseleleri jáne tabıǵat paıdalaný komıtetine parlamenttik oppozıtsııadan Aleksandr Mılıýtın (Qazaqstan Halyq partııasy) tóraǵa bolyp saılandy.


Bizdiń kanalymyzǵa jazylyńyz:

Bólisińiz:

Avtor:

Rýslan Ǵabbasov

Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Aıdar Ospanalıev
Aıdar Ospanalıev
954-059

MURAǴAT