Jańa Qazaqstandaǵy memqyzmetshiniń bolmysy qandaı bolýy tıis
2022 jylǵy 15 maýsym 21:47

Jańa Qazaqstandaǵy memqyzmetshiniń bolmysy qandaı bolýy tıis

NUR-SULTAN. QazAqparat – Búgin QR Memlekettik qyzmet isteri agenttiginiń uıymdastyrýymen «Jańa Qazaqstandaǵy memlekettik qyzmetshiniń bolmysy» atty ashyq formatta pikir almasý ótti.

Іs-shara maqsaty – Jańa Qazaqstandaǵy memlekettik apparatty kásibılendirý jolynda memlekettik qyzmetshiniń bolmysyn talqylaý, túsiný.

Kezdesýge QR Parlamenti Senatynyń depýtaty Nurtóre Júsip, QR Parlamenti Májilisiniń depýtattary Amanjol Áltaı, Janarbek Áshimjan, Nazılıa Razzak, Berik Bekjanov, «Egemen Qazaqstan» AQ basqarma tóraǵasy Darhan Qydyráli, «Habar Agenttigi» AQ basqarma tóraǵasy Berik Ýálı, Eýropalyq quqyqtar jáne adam quqyqtary saraptamalyq ınstıtýtynyń dırektory Marat Báshimov, Memlekettik qyzmet isteri agenttigi janyndaǵy Qoǵamdyq keńes tóraǵasy Serikjan Qanaev, qoǵam qaıratkeri Sádibek Túgel, «KAZGUU» basqarma tóraǵasy Talǵat Nárikbaev, «Academy of Labour Relations» JShS bas dırektory Bıbigúl Nurasheva, jýrnalıster Denıs Krıvosheev, Qanat Áýesbaı, Ádil Jalılov, «Ádildik joly» qoǵamdyq birlestiginiń atqarýshy dırektory Dıdar Smaǵulov, «Qoǵamdyq pikir» zertteý ınstıtýtynyń ǵylymı konsýltanty Qalamqas Esimova, «KAZGUU» bıznes-mektebiniń dırektory Alına Abdrahmanova, QR eńbek sińirgen qaıratkeri Qanat Aıtbaev, Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń dırektory Aıbolat Jaýdyr, Joǵary kólik jáne kommýnıkatsııa kolledji dırektory Zýlfýhar Gaıpov qatysty.

Qazaqstan Respýblıkasynyń Memlekettik qyzmet isteri agenttiginiń tóraǵasy Darhan Jazyqbaev kezdesýdiń mańyzdylyǵyn atap ótti.

«Memlekettik qyzmet ol paıda tabý men kún kórýdiń quraly dep qabyldaýdan áldeqaıda bıik túsinik. Ol – paryz, adamshylyq borysh, halyqtyń senimi. Ár azamattyń eldiń aldyndaǵy adamshylyq mıssııasy – elge qyzmet etý. Bul - zor mártebe. Sanada osyndaı túsinikterdi ornyqtyrǵan kezde ǵana adal nıetti, ádil, halyqqa qyzmet etýdi paryz dep sanaıtyn qyzmetshilerdiń tolqyny qalyptasady. Kersinshe jaǵdaıda el úshin emes, jeke bas úshin qyzmet jasaý basty maqsatqa aınalady. Sondyqtan basty ustanym – adal nıetpen elge qyzmet etý bolýy kerek. Osy baǵytta sanaly túrde jańǵyrý qajet. Memlekettik qyzmetshige azamattyq sana, eldik sana, memleketshildik sana basty qundylyq bolýy tıis», - dedi ol.

Sarapshylar memlekettik qyzmetshiniń halyqqa adal ári kásibı qyzmet kórsetýi, onyń áleýmettik jaǵdaıyn jaqsartý, BAQ tarapynan qoldaý arqyly memlekettik qyzmettiń bedelin kóterý, memlekettik tildiń mártebesi, oqytý baǵdarlamalaryna tarıhı tulǵalardyń ónegesin engizý týraly sóz qozǵady.

Kezdesýde memlekettik qyzmetshininiń halyq aldynda ashyq bolýy, qyzmettik mindetterin oryndap qana qoımaı, qoǵamda sybaılas jemqorlyqqa qarsy mádenıetti qalyptastyrýda ózgelerge úlgi bolý kerektigi aıtyldy.

Kezdesý barysynda sarapshylar óz usynystaryn ortaǵa salyp, memlekettik qyzmetshiniń bolmysyna qatysty pikirlermen bólisti.


Jańalyqtar

Úrdis

MURAǴAT