Jambylda jol apatyna ushyraǵan Ózbekstan azamattary eline attandy
2022 jylǵy 14 mamyr 18:27

Jambylda jol apatyna ushyraǵan Ózbekstan azamattary eline attandy

NUR-SULTAN. QazAqparat – Ózbekstan tótenshe jaǵdaılar mınıstriniń orynbasary Azızbek Latıfjonov bastaǵan jedel top kolonnamen jolǵa shyqty. Olar Jambyl oblysy Jýaly aýdanynan 8 jedel medıtsınalyq járdem kóligi jáne 1 «Vanholl» markaly jolaýshylar avtobýsymen attandy, dep habarlaıdy QazAqparat QR TJM baspasóz qyzmetine silteme jasap.

Mınıstrliktiń habarlaýynsha, avtokólikterde zardap shekken 13, ýaqytsha ornalastyrý pýnktindegi 7 adam men 2 qaza tapqan adamnyń denesi bar.

Ózbekstan TJM orynbasary Jambyl oblysyndaǵy áriptesterine jáne óz otandastaryn qutqarýǵa jumyldyrylǵan barlyq qyzmetterge alǵysyn bildirdi.

14 mamyr saǵat 7:15-te kolonna Qazaqstan Respýblıkasynyń shekarasynan ótti.

1980 jáne 1965 jyldary týǵan Ózbekstannyń eki azamaty Jýaly aýdany aýrýhanasynyń jansaqtaý bóliminde jatyr.


Esterińizge sala keteıik, 12 mamyr kúni saǵat 15:46-da Jambyl oblysynyń Jýaly aýdanynda «Almaty-Tashkent» avtojolynyń 571 shaqyrymynda jol-kólik oqıǵasy bolǵan edi. Eki adam oqıǵa ornynda qaıtys bolyp, on alty adam túrli jaraqattarmen Jýaly aýdanynyń ortalyq aýdandyq aýrýhanasyna jatqyzyldy. Salonda barlyǵy 51 adam bolǵan, onyń 46-sy - Ózbekstan Respýblıkasynyń azamaty.

Jambyl oblysy TJD «jedel jeli» telefony jumys istedi. Jergilikti atqarýshy organdardyń kúshimen Mádenıet úıiniń bazasynda evakopýnkt jáne ystyq tamaq uıymdastyrylyp, oǵan 32 adam ornalastyrylǵan bolatyn.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT