Jambylda zańsyz altyn óndirýshilerden qarý men altyn tárkilendi

TARAZ. QazAqparat – Jambyl oblysynda altyn izdeýshilerden qarý-jaraq pen altyn tárkilendi, dep habarlaıdy QazAqparat tilshisi.

Jambyl oblysynyń Moıynqum aýdanynda 52 jastaǵy Almaty qalasynyń turǵyny uıymdastyrǵan quramynda altyny bar kendi zańsyz óndirý orny anyqtaldy.

Tekserý barysynda tirkelmegen 16 kalıbrli bir uńǵyly ańshylyq myltyq, jarylys jumystaryn júrgizýge arnalǵan 8 dana qoldan jasalǵan tutandyrǵysh tabyldy. Bul týraly oblystyq polıtsııa departamentiniń baspasóz qyzmeti habarlady.

«Atalǵan derekke qatysty Qazaqstan Respýblıkasy Qylmystyq kodeksiniń 287-baby 3-bóligi (atys qarýyn (tegis uńǵyly ańshylyq qarýdan basqa), oq-dárilerdi, jarylǵysh zattardy nemese jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý) jáne 334-baby (jer qoınaýyn óz betinshe paıdalaný) boıynsha sotqa deıingi tergeý amaldary bastaldy. Qajetti saraptamalar taǵaıyndaldy»,- delingen vedomstvo habarlamasynda.