Jambylda «qyzyl syzyqqa» qaramaı salynǵan 74 nysan súrildi

TARAZ.QazAqparat – Jambylda oblysynda «qyzyl syzyqqa» qaramaı qurylys júrgizgen 123 nysan anyqtalyp, onyń 74-ine shara qoldanylǵan, dep habarlaıdy QazAqparat tilshisi.

Búginde óńirde «Qyzyl syzyq» normalaryn buzǵan 123 nysannyń 74-ine qatysty shara qoldanylǵan.

Onyń ishinde 35 nysannyń menshik ıeleri óz erkimen buzsa, 39 nysandy arnaıy tehnıka kúshimen alýǵa týra kelgen.

Al, qalǵan 49 nysanǵa tıisti shara qabyldaý úshin aýdan ákimdikteri jumys atqaryp jatyr.

Bul týraly ÓKQ aqparat alańynda ótken brıfıng barysynda Jambyl oblysy ákimdigi sáýlet jáne qala qurylysy basqarmasynyń basshysy Arman Ábdeshov aıtyp ótti.

Sondaı-aq, spıker memlekettik baǵdarlamalardyń júzege asyrylýy boıynsha jasalyp jatqan jumysqa toqtaldy.

«Tsıfrlyq Qazaqstan» baǵdarlamasy aıasynda «Memlekettik qala qurylysy kadastryn» qurý jáne júrgizý boıynsha 2018 jyly is-sharalar jospary bekitildi. Soǵan sáıkes, qalalar men aýdan ortalyqtarynyń ınjenerlik júıesin túgendeý jumysy atqaryldy. Jalpy Jambyl oblysynda 371 eldi meken bar, onyń ishinde 366 eldi meken bas jospar jáne ońaılatylǵan syzba jobamen qamtamasyz etilgen», - dedi, Arman Ábdeshov.

Sondaı-aq, «KAZGISA» JShS Taraz qalasy geoportalynyń tehnıkalyq platformasyn óristetý jumysyn júrgizip, atalǵan geoportal e-jambyl.kz domen ataýymen iske qosylǵany aıtyldy.

«Atalǵan geoportal e-jambyl.kz domen ataýymen jumys istep tur. Osy geoportal arqyly memlekettik qyzmetter tsıfrlandyrylady. ıAǵnı Taraz qalasy boıynsha qala qurylysy jobalary, ınjenerlik jelilerdi túgendeý shekaralary, bos jer telimderi, ǵımarattar men kóshe joldary jelisi jaıly jáne ózge de aqparattardy alýǵa, engizýge arnalǵan. Jalpy búginde Taraz qalasynyń óńirlik geoaqparat júıesin ázirleý jumysy - 95,83 paıyz»,-deıdi basqarma basshysy.