Jambyl oblysynda selden qoradaǵy mal ólip, ózen arnasynan tasydy
2022 jylǵy 24 maýsym 11:06

Jambyl oblysynda selden qoradaǵy mal ólip, ózen arnasynan tasydy

TARAZ. QazAqparat – Jambyl oblysynda sel júrip, qoradaǵy mal óldi, ózen arnasynan tasyp joldy basty, kólik mingen adamdar sý ortasynda qaldy, dep habarlaıdy QazAqparat.

QR Tótenshe jaǵdaılar mınıstrliginiń baspasóz qyzmetinen málim etkendeı, 23 maýsym kúni saǵat 20.00-de Qordaı aýdany, Úlken Sulýtór aýylynda nóser jańbyr saldarynan Yrǵaıty ózeniniń boıymen sel tasqyny ótti.

Saldarynan jeke turǵyn úılerdiń 2 sharýashylyq qurylysy qırady, aýyl joldaryn sý basty.

«Qaza bolǵandar men zardap shekkender joq. Aldyn ala málimet boıynsha, mal shyǵyny bar. Jergilikti atqarýshy organnyń komıssııasy kelgen zalal mólsherin anyqtap jatyr», - dedi vedomstvodan.

Oqıǵa ornyna Tótenshe jaǵdaılar departamentinen 8 qyzmetker, 2 tehnıka, jergilikti atqarý organdarynan 5 qyzmetker jáne 2 tehnıka barǵan.

Budan bólek, osy kúni saǵat 23:25-te Qordaı aýdany, Sharbaqty aýylynan 4 shaqyrym jerde Yrǵaıty ózeniniń deńgeıi kúrt kóterilip, arnasynan asqan.

«Ózen jaǵasynda 11 adam demalyp jatqan. Sýdyń kóterilý saldarynan aınalasyn sý basqan dóńes jerde 6 adam kólik ishinde qalyp qoıdy. Sondaı-aq ekpindi aǵys demalýshylardyń ekinshi kóligin shaıyp ketti.

24 maýsymda saǵat 01:15-te TJD qutqarýshylary aralda qalǵan barlyq adamdy qutqardy. Olarǵa medıtsınalyq kómek qajet bolmady. Qaza bolǵandar men zardap shekkender joq», - dedi QR TJM baspasóz qyzmetinen.

Eske salaıyq, keshe qatty jaýyn saldarynan Almaty oblysynyń Kegen aýdanyndaǵy Túmenbaı aýylynda birneshe úıdiń aýlasyn sý basty. Sondaı-aq Kegen aýdanynda respýblıkalyq jol jıegin sý shaıyp ketti.



Uqsas jańalyqtar

Jańalyqtar

Úrdis

MURAǴAT