Jambyl oblysynda «Áýlıeata jastary» baspana baǵdarlamasy bastalady
2022 jylǵy 24 maýsym 12:37

Jambyl oblysynda «Áýlıeata jastary» baspana baǵdarlamasy bastalady

NUR-SULTAN. QazAqparat - Jambyl oblysynda jastarǵa arnalǵan «Áýlıeata jastary» ıpotekalyq turǵyn úı baǵdarlamasy bastalady, dep habarlaıdy QazAqparat.

Jańa baǵdarlamany Jambyl oblysynyń ákimdigi men Otbasy bank birlesip júzege asyrady.

Joba boıynsha jasy 35-ten aspaǵan: jas muǵalimder, dárigerler, medbıkeler, mádenıet salasynyń qyzmetkerleri, sportshylar, jattyqtyrýshylar, jýrnalıster, ýnıversıtet oqytýshylary men ǵylymı qyzmetkerler baspanaly bola alady.

Baspana alýǵa 13 mln teńgege deıin zaem beriledi (eger múliktiń quny odan asatyn bolsa, satyp alýshy aıyrmashylyqty óz qarajaty esebinen tóleı alady). Bastapqy jarna – 5%, nesıe boıynsha syıaqy mólsherlemesi – jyldyq 5% (JTSM 5,2%), nesıeniń tólem merzimi – 19 jylǵa deıin.

Baǵdarlamaǵa qatysýshylardyń Jambyl oblysy aýmaǵyndaǵy resmı jumys ótili ótinish bergen kezde sońǵy 12 aıdan kem bolmaýy tıis. Tabysy da eskeriledi. Otbasynyń árbir múshesi úshin ol 3,9 eselengen eń tómengi kúnkóris deńgeıinen aspaýy kerek (145 817 teńge). Sondaı-aq baǵdarlamaǵa qatysýshy men onyń otbasy músheleriniń atynda sońǵy 5 jylda jyljymaıtyn múlik bolmaýy kerek.

Ótinimderdi qabyldaý www.e-jambyl.kz portalynda 20 shilde kúni bastalyp, 30 shildege deıin jalǵasady. Odan ári qatysýshylardyń tizimi jasalyp, Otbasy bankk jiberiledi. Bankte úmitker tólem qabilettiligin tekserip, naryqtan páter tabýy qajet. Baspanany alǵashqy nemese ekinshi naryqtan jáne «Qazaqstan turǵyn úı kompanııasy» AQ kepildigimen salynyp jatqan nysandardan satyp alýǵa bolady.

Aıta keteıik, qazirgi tańda oblystyń 35 jasqa deıingi 7 140 turǵyny baspana kezeginde tur. Ótken jyly memlekettik baǵdarlama boıynsha 318 azamat páter aldy. Bıyl «Áýlıeata jastary» baǵdarlamasy tıimdi sharttarmen turǵyn úı alýdyń taǵy bir qosymsha quraly bolady.

«Jambyl oblysynyń ákimdigi jańa jobaǵa 500 mln teńge bóldi, al Otbasy bank jeńildetilgen sharttarmen nesıe berýge kómektesedi», – deıdi Otbasy bank Jambyl oblystyq fılıalynyń dırektory Gúlzat Beknazarova.


Uqsas jańalyqtar

Jańalyqtar

Úrdis

MURAǴAT