Zeınetaqy jınaǵyn baspana úshin paıdalaný erejeleri jarııalandy

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi zeınetaqy tólemderin turǵyn úı jaǵdaılaryn jaqsartý úshin paıdalaný erejelerin jarııalady, dep habarlaıdy QazAqparat.

Uqsas jańalyqtar

Prezıdent tapsyrmasy: Qazaqstandyqtar 356,4 mlrd teńge zeınetaqysyn baspanaǵa jumsady

21 qańtar kúni bekitilgen qujattyń tolyq mátini zan.gov.kz saıtynda ornalastyryldy.

Turǵyn úı jaǵdaıyn jaqsartqysy keletinder birjolǵy zeınetaqy tólemin kelesi maqsattarǵa paıdalana alady:

- turǵyn úıdi satyp alý-satý, jekeshelendirý, bólip tóleý, aıyrbastaý (aıyrbas jasaý) sharttary boıynsha, turǵyn úı qurylysyna úlestik qatysý týraly zańnamaǵa sáıkes turǵyn úı qurylysyna úlestik qatysý týraly sharttar boıynsha;

- jeke turǵyn úı salý úshin (nysanaly maqsaty bar jer ýchaskesin satyp alýdy qosa alǵanda – jeke turǵyn úı qurylysy nemese jeke qosalqy sharýashylyq) tolyq esep aıyrysý;

- ıpotekalyq turǵyn úı qaryzyn alý úshin bastapqy jarna engizý;

- turǵyn úı qaryzdaryn ishinara nemese tolyq óteý, ıpotekalyq turǵyn úı qaryzyn qaıta qarjylandyrý;

- ıpotekalyq turǵyn úı qaryzyn ishinara nemese tolyq óteý, turǵyn úı qurylys jınaqtary júıesi boıynsha jeke turǵyn úı salý (nysanaly maqsaty bar jer ýchaskesin satyp alýdy qosa alǵanda – jeke turǵyn úı qurylysy nemese jeke qosalqy sharýashylyq), turǵyn úı qaryzyn alý;

- ıslam bankiniń qarjylandyrýy sheńberinde turǵyn úıdi satyp alý, ıslam bankiniń turǵyn úı satyp alý jónindegi mámileni qarjylandyrýy sheńberinde bereshekti ishinara, tolyq óteý;

- turǵyn úı qurylysy baǵdarlamalary men daǵdarysqa qarsy baǵdarlamalar sheńberinde berilgen satyp alý quqyǵymen turǵyn úıdi uzaq merzimdi jaldaý sharttary boıynsha bereshekti ishinara nemese tolyq óteý.

Aıta keteıik, QR azamattary birjolǵy zeınetaqy tólemderin atalǵan maqsattarǵa shekteýsiz paıdalana alady.

Sondaı-aq birjolǵy zeınetaqy tólemin alýshynyń jubaıy (zaıyby) jáne (nemese) jaqyn týystary atynan ótinish berýshige (-lerge) tıesili birjolǵy zeınetaqy tólemderin atalǵan maqsattarǵa paıdalanýǵa ruqsat berilgen. Ol úshin taraptar jeke kabınette birjolǵy zeınetaqy tólemderin berý týraly kelisim jasasady. Kelisim olardyń ETsQ nemese nekeni (erli-zaıyptylyqty) nemese týystyq qatynastardy rastaıtyn qujattardy qosa bere otyryp, ýákiletti operatordyń ishki qujatynda belgilengen ózge de elektrondyq tásilmen kýálandyrylady.

Málim bolǵandaı, jeke menshikte turǵyn úıdiń bolýy birjolǵy zeınetaqy
tólemin paıdalanýǵa ruqsat berýden bas tartý úshin negiz bola almaıdy.

Alaıda, zeınetaqy shotyndaǵy qarajat qolma-qol aqsha retinde berilmeıdi.

Eskertilip ótkendeı, jyljymaıtyn múlikti óziniń jubaıynan (zaıybynan), jaqyn týystarynan satyp alýǵa bolmaıdy.

Budan bólek, Qazaqstan Respýblıkasynyń zańnamasynda kózdelgen tártippen sot sheshimi boıynsha jyljymaıtyn múlikti ótkizý jaǵdaılaryn qospaǵanda, birjolǵy zeınetaqy tólemderin paıdalana otyryp 5 (bes) jyl ishinde menshikke resimdelgen jyljymaıtyn múlikti ótkizýge jol berilmeıdi.

Eske salsaq, 2 qańtarda QR Prezıdenti zeınetaqy jınaǵynyń bir bóligin maqsatty paıdalanýǵa qatysty zańǵa qol qoıdy.

Qazaqstandyqtar zeınetaqy jınaqtaryn paıdalana alý úshin «jetkiliktilik shegi» belgilendi.

Zeınetaqy shotyndaǵy qarajatty jáne turǵyn úı jaǵdaıyn jaqsartý úshin paıdalanýǵa bolatyn somany birneshe jolmen tekserýge bolady. BJZQ-daǵy qarajatyn kimder jáne qalaı paıdalana alatyny buǵan deıin habarlandy.