Zeınet jasyn tómendetý máselesin Úkimet talqylaǵan joq – Vıtse-Premer
2022 jylǵy 28 maýsym 11:45

Zeınet jasyn tómendetý máselesin Úkimet talqylaǵan joq – Vıtse-Premer

NUR-SULTAN. QazAqparat – Premer-Mınıstrdiń orynbasary, Qarjy mınıstri Erulan Jamaýbaev qazaqstandyqtardyń zeınet jasyn tómendetý máselesi esh qarastyrylmaǵanyn aıtty, dep habarlaıdy QazAqparat tilshisi.

Ótken aptada Premer-Mınıstrdiń orynbasary Eraly Toǵjanov zeınet jasyn tómendetý máselesi talqylaý satysynda degen edi. Jýrnalıster búgin Úkimet úıinde E. Jamaýbaevtan osy máseleni surap kórdi.

«Ázirge bul taqyryp (zeınet jasyn tómendetý – red.) qaralǵan joq», - dep jaýap berdi Erulan Jamaýbaev.

Sondaı-aq, ol zeınetaqy jasyn tómendetý boıynsha esepteýlerge qatysty máselege túsinikteme berdi.

«Zeınetaqy tólemderine jyl saıyn 2,2 trln teńgeden astam qarajat jumsalady. Kez kelgen ózgeris trıllıondarmen sanalady. Úkimet bul máseleni talqylaǵan joq. Arnaıy zań bar», - deıdi Erulan Jamaýbaev.

Onyń aıtýynsha, kez kelgen ózgeris tereń esepteýler men salalyq talqylaýdy qajet etedi.

Qarjy mınıstriniń aıtýynsha, naqty talqylaý áli bolǵan joq.

«Jyl saıyn respýblıkalyq bıýdjetten zeınetaqy tólemderine 2,2 trln teńge bólemiz. Eńbek mınıstrliginde kóptegen jaqsy baǵdarlamalar bar, sonyń ishinde «Kúmis jasyn» ataýǵa bolady. Bul baǵdarlamalarǵa belgili bir qarajat bólinedi. Ázirge biz qoldanystaǵy zańǵa súıenemiz», - dedi Erulan Jamaýbaev.

Buǵan deıin Qarjy mınıstri óziniń qansha jalaqy alatynyn aıtqan edi.



Jańalyqtar

Úrdis

MURAǴAT