Zeınet jasyn tómendetý máselesi talqylanyp jatyr – Tamara Dúısenova
2022 jylǵy 30 maýsym 11:46

Zeınet jasyn tómendetý máselesi talqylanyp jatyr – Tamara Dúısenova

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Tamara Dúısenova zeınet jasyn talqylaý týraly vıtse-premer Erulan Jamaýbaevtyń málimdemesine jaýap berdi, dep habarlaıdy QazAqparat tilshisi.

Buǵan deıin Premer-Mınıstrdiń orynbasary, Qarjy mınıstri Erulan Jamaýbaev qazaqstandyqtardyń zeınet jasyn tómendetý máselesi esh qarastyrylmaǵanyn aıtqan edi.

«Munda eshkim ótirik aıtpady. Bıýdjettik protsesti ózderińiz bilesizder. Qazir bizdiń mınıstrliktiń Qarjy mınıstrligimen jáne Ulttyq ekonomıka mınıstrligimen birlesken jumys toby bar. Jumys toby birinshi grafıkten ótti. Endi ekinshi grafıkte mınıstrlerdiń aldyna shyǵýymyz kerek. Odan keıin respýblıkalyq bıýdjettik komıssııaǵa shyǵamyz. Sonda qazir biz birinshi toptaǵy jumysty ǵana bitirdik. Onyń ústine Erulan Jamaýbaev Qarjy mınıstri ǵana emes, vıtse-premer. Biz áli mınıstrlerdiń aldyna jetken joqpyz», - dep jaýap berdi T. Dúısenova Parlament palatalarynyń birlesken otyrysynan keıin tilshiler saýalyna.

Sonymen birge, Eńbek mınıstri eldegi áleýmettik sala, zeınetaqy máseleleri jóninde aıtyp berdi.

«Qazir zeınetke shyǵyp jatqandardyń zeınetaqylary buryn shyqqan zeınetkerlerdikinen tómen, sebebi eńbek ótilderi az. Sondyqtan qazirgi birinshi másele – bazalyq zeınetaqylardyń parametrlerin ózgertý, ıaǵnı ony kóbeıtý, ekinshi – yntymaqtastyrylǵan zeınetaqy máselerin kóterý, onyń da parametrlerin qarastyrý. Sodan keıin zań aıasynda erte zeınetke shyǵý máselesi de qarastyrylǵan. «Kúmis jas» degen jańa baǵdarlama jasalyp jatyr. Barlyq esepterimizdi jumys tobyna ótkizdik, endi ekinshi kezeńge shyǵyp jatyrmyz. Bıýdjetti qaraǵanda jumys tobynda eń aldymen vıtse-mınıstrler jumys isteıdi, meniń de vıtse-mınıstrim sol topqa baryp júr. Keıingi topta bul másele mınıstrler deńgeıinde talqylanady. Sondyqtan, qazir jumys tobynda barlyq mınıstrlik ókilderi jumys istep jatyr. Al Qarjy mınıstriniń ony bilý-bilmeýinen meniń habarym joq», - dedi Tamara Dúısenova.


Uqsas jańalyqtar

Jańalyqtar

Úrdis

MURAǴAT