Zagrebte «qańtar tragedııasynyń» oqıǵalary talqylandy
2022 jylǵy 29 qańtar 18:56

Zagrebte «qańtar tragedııasynyń» oqıǵalary talqylandy

ZAGREB. QazAqparat - Horvat jurtshylyǵynyń, ǵylym, bilim jáne mádenıet ókilderiniń qatysýymen «Horvatııa – Qazaqstan» dostyq qoǵamynyń jyl saıynǵy otyrysy ótti. Shara barysynda Qazaqstandaǵy qańtar aıyndaǵy oqıǵalar talqylandy, dep habarlaıdy QazAqparat.

QR Syrtqy ister mınıstrliginen málim etkendeı, Qazaqstannyń Horvatııadaǵy Elshisi Tólejan Barlybaev pikirtalasqa qatysýshylardy Qazaqstandaǵy oqıǵalar týraly habardar etip, terrorızm, ekstremızm jáne uıymdasqan qylmystyń erekshe qaýiptiligin atap ótti. Basshylyqtyń batyl sharalarynyń arqasynda Qazaqstan turaqsyzdandyrý men haosty boldyrmaı, qysqa merzimde jeke adamnyń, qoǵam men memlekettiń qaýipsizdigin qamtamasyz ete otyryp, zańdylyq pen quqyqtyq tártipti qalpyna keltire aldy.

Dıplomat Qazaqstannyń jańa Úkimetiniń ekonomıkalyq reformalardy júzege asyrý jáne ýaqyty jetken áleýmettik máselelerdi sheshý jónindegi mindetteri týraly aıtyp berdi. Ol Qazaqstannyń sheteldik áriptester men bıznes aldynda qabyldaǵan barlyq mindettemeleri tolyq kólemde oryndalatynyn habarlady. «Halyq únine qulaq asatyn memleket» tujyrymdamasy aıasynda saıası jańǵyrý baǵytynyń myzǵymastyǵy jáne Qazaqstannyń adam quqyqtaryn qamtamasyz etýge degen berik beıildiligi atap ótildi. Osy turǵyda tergeý is-sharalary barysynda Memleket adam quqyqtarynyń saqtalýyn jáne sot isin júrgizý zańdylyǵyn baqylaýdy qamtamasyz etedi dep kórsetilgen.

Dostyq qoǵamynyń tóraǵasy Andrııa Karafılıpovıch QR basshylyǵynyń memlekettik basqarý jáne ulttyq qaýipsizdik júıelerin, sondaı-aq ekonomıkalyq saıasatty qaıta qalyptastyrý jónindegi bastamalaryn joǵary baǵalady. Onyń baǵalaýynsha, bul reformalar táýelsiz Qazaqstan tarıhyndaǵy jańa kezeńdi ashady. QR basshylyǵynyń is-qımyl baǵdarlamasynyń áleýmettik baǵyttylyǵy, atap aıtqanda, «Qazaqstan halqyna» qor qurý jáne basqa da qadamdardyń mańyzdylyǵy atap ótildi.

Belgili áleýmettanýshy, ǵylym doktory Jelko Haımer buryn-sońdy bolmaǵan daǵdarys jaǵdaıynda Qazaqstan halqy birlikti, sondaı-aq toleranttylyq pen ultaralyq kelisim dástúrlerine beıildilikti saqtaı otyryp, batyldyq pen qaısarlyq tanytqanyn atap ótti. Onyń pikirinshe, saıası jáne áleýmettik-ekonomıkalyq qaıta qurýlardy sátti júzege asyrýdyń kepili áleýmettik turaqtylyq bolyp tabylady.

Horvatııanyń eks-prezıdenti S.Mesıch jáne dóńgelek ústel otyrysynyń basqa da qatysýshylary adam qurbandyǵyna ákep soqqan terrorızm aktilerin qatań aıyptap, Qazaqstan táýelsizdigi tarıhyndaǵy eń aýqymdy daǵdarysty eńserýde Qazaqstan halqymen yntymaqta bolatynyn bildirdi. QR-daǵy «qańtar tragedııasynyń» mańyzdy sabaqtarynyń biri ulttyq qaýipsizdikti qamtamasyz etý jáne terrorızmge qarsy kúres, sondaı-aq áleýmettik ádilettilik, bılik pen bıznestiń qoǵam aldyndaǵy jaýapkershiligin kúsheıtý qajettiligi bolyp tabylatyny atap ótildi.

Sońynda dostyq qoǵamynyń músheleri Qazaqstan-Horvat yntymaqtastyǵynyń damýyn talqylady. 2021 jyly Qazaqstan men Horvatııa arasyndaǵy syrtqy saýda aınalymy 650 mln. dollardan asyp, táýelsizdiktiń barlyq jyldarynda rekordtyq deńgeıge jetkeni atap ótildi. Aǵymdaǵy jyly josparlanyp otyrǵan ekonomıkalyq yntymaqtastyq jónindegi ÚAK otyrysy men iskerlik saparlar saýdanyń odan ári ósýine yqpal etetin bolady.

Dostyqty nyǵaıtýǵa qosqan zor úlesi úshin Elshi T.Barlybaev qoǵam basshysy A.Karafılıpovıchke QR basshylyǵy atynan «Qazaqstan Táýelsizdiginiń 30 jyldyǵy» medalin tapsyrdy.


Jańalyqtar

MURAǴAT