«WorldSkills Kazakhstan-2019» chempıonatynda top jarǵan túrkistandyqtar marapattaldy

TÚRKІSTAN. QazAqparat - Nur-Sultan qalasynda ótken elimizdiń tehnıkalyq jáne kásiptik bilim berý salasynyń áleýetin kórsetetin «WorldSkills Kazakhstan-2019» V respýblıkalyq chempıonatynyń jeńimpazdaryn Túrkistan oblysy ákiminiń orynbasary Sáken Qalqamanov qabyldady, dep habarlaıdy QazAqparat oblys ákiminiń baspasóz qyzmetines silteme jasap.

Oblys basshylyǵy men adamı áleýetti damytý basqarmasynyń basshylyǵy oıy ushqyr ári bilimdi jastardy jetistikterimen quttyqtap, alǵys hattar jáne baǵaly syılyqtarmen marapattady.

«Elimizde halyqaralyq standarttar negizinde jastarǵa kásiptik bilim berý jáne tehnıkalyq mamandyqtar boıynsha óndiris oryndaryna kásibı maman daıarlaý basty másele. Zaman talaby básekelestikke baǵyttalǵanda, basty prıntsıp – biliktilik pen tájirıbege negizdeledi. Osy maqsatta kúlli álem memleketteri kásiptik bilim berý salasynda «WorldSkills» chempıonatyna asa kóńil bólip otyr», - dedi Sáken Qalqamanov.

Eske sala keteıik, tehnıkalyq jáne kásiptik bilimdi damytýǵa baǵyttalǵan baıqaýda Túrkistan oblysynan 17 stýdent júldeli oryndy ıemdendi. Oblys mártebesin kótergen talaby joǵary stýdentter 4 altyn, 2 kúmis, 2 qola jáne 9 nomınatsııalyq medal jeńip alyp, komandalyq esepte respýblıka kóleminde úshtikke kirdi.

Tehnıkalyq jáne kásiptik bilimdi damytýǵa baǵyttalǵan baıqaýǵa qatysý úshin elimizdiń barlyq óńirlerinen kelgen 425 stýdent 38 túrli mamandyq boıynsha jumys daǵdylary deńgeıimen saıysqan.

Baıqaýǵa qatysýshylardy 500-ge jýyq sarapshy-tóreshi baǵalaǵan edi. Aldaǵy ýaqytta Túrkistan oblysynyń ákimdigi men kásiptik-tehnıkalyq mamandyqty ıgerýge baǵyttalǵan kolledjder jáne áleýmettik áriptestermen birlese otyryp, bilikti mamandar daıarlap, oblysty ónerkásiptik hab ortalyǵyna aınaldyrýdy maqsat etip otyr.

Osy oraıda, bilikti mamandar daıarlaıtyn 4 kolledjdi óńirdegi iri kompanııalarǵa senimgerlik basqarýǵa berý baǵytynda tıisti jumystar atqarylýda. Marapattaý rásiminde oblys basshylyǵy jastarǵa sondaı-aq aldaǵy jyly Azııa jáne Eýropada ótetin álemdik chempıonatta el namysyn qorǵap, halyqaralyq dárejede sheberlik kórsetýlerin tiledi. Oblys basshysynyń orynbasary jıyn sońynda jeńimpazdar men ustazdar qaýymymen birge estelik sýretke tústi.