Voleıbol sportynyń keńinen damýy úshin ár óńirde jaǵdaı jasaý qajet – Amandyq Batalov
2022 jylǵy 1 shilde 09:10

Voleıbol sportynyń keńinen damýy úshin ár óńirde jaǵdaı jasaý qajet – Amandyq Batalov

NUR-SULTAN. QazAqparat – Jýyrda memlekettik qyzmettiń ardageri, Qazaqstannyń eńbek sińirgen sport qaıratkeri Ersultan Bekturǵanovtyń 70 jyldyq mereıtoıyna oraı elordadaǵy «Astana» sport kesheninde voleıboldan ardagerler arasynda halyqaralyq týrnır ótken edi. Osy jarysqa óz komandasyn jasaqtap, alyp kelgen azamattyń biri – memleket qaıratkeri, voleıboldan sport sheberi, Almaty oblysynyń burynǵy ákimi Amandyq Batalov. Ol QazAqparat tilshisine otandyq sportty damytýdyń joldary týraly áńgimelep berdi.

– Amandyq Ǵabbasuly, el sportyn órkendetýdiń mańyzy týraly aıtsańyz?

– Mańyzy óte zor. Ózim jaýapty memlekettik qyzmetti atqaryp júrgen kezimde, qolymnan kelgenshe sportty damytýǵa bar kúsh-jigerimdi saldym. Jetisý óńirinde kásibı sporttyń jáne buqaralyq sport túrleriniń keń qanat jaıýyna jan-jaqty mán berýge tyrystym. Almaty oblysynyń ákimi qyzmetine kelmeı turyp-aq voleıbol komandalaryn qurǵan edim. Sonyń ishinde ózimniń bastamam boıynsha «Rahat», «Jetisý» jáne «Aıqarakóz» komandalary quryldy. Bilikti bapkerlerdiń tyńǵylyqty jattyqtyrýynyń arqasynda olar úzdik nátıjelerge qol jetkizdi.

Ár aýdan men ár aýylda kishkentaı balalardan bastap sportpen shuǵyldanýyna múmkindik bolýy kerek. Osy maqsatta biraz ister atqaryldy. Jattyqtarýshylar shaqyryldy, olarǵa tıisti eńbekaqy tólendi, jatatyn jerleri jáne basqa máselelerin de sheshken edik. Jaqsy nátıje kórsetken balalarǵa granttar berildi. Kishkentaı kúninen jaqsy bapkerden tálim alyp, jan-jaqty shyńdalyp, ózderin jetildire bilgen jas sportshylar óse kele sheberlikterin kórsetti. Halyqaralyq dárejedegi sport sheberi dárejesine jetti, qazir Qazaqstannyń qurama komandasynda oınap júr.

El azamattarynyń sportta úlken tabystarǵa jetýine múmkindikter mol. Alaıda, barlyq oblysta sport jaqsy damyp ketti dep aıta almaımyn. Sol sebepti elimizdiń barlyq óńirinde sport sektsııalary ashylýy jáne jańa komandalardyń qurylýy óte mańyzdy. Aýyl men aýdandarda jarystar ótse, básekelestik arta túsedi. Sondaı tartysty dodalar ótken saıyn myqty sportshylar shyǵady.

– Ózińiz Almaty oblysyna basshylyq jasaǵan kezde balalar sportyn damytýǵa qandaı qadamdar jasaldy?

– Baldyrǵandar arnaıy kelip aınalyssyn dep Almaty oblysynda 14 sport keshenin salyp berdik. Bul mekteptegi sportzaldardan bólek. Onyń ishinde balalar kúres, boks, gımnastıka, fýtbol, voleıbol, basketbol jáne basqa da sport túrlerimen shuǵyldanady. Sport keshenderine barǵan balalardyń arasynan erteń-aq Jaqsylyq Úshkempirovter men Serik Qonaqbaevtar shyǵady.

– Biraz jasqa kelseńiz de, sporttan qol úzbeý, ardagerler arasyndaǵy jarystarǵa qatysý ózińizge kúsh-qýat bere me?

– Árıne. Ár adam óziniń dene bitimine mán berýi kerek. Salaýatty ómir saltyn ustaný izgi oılarǵa jeteleıdi jáne maǵynaly ári uzaq ómir súrýdiń kepili. Keıde jumystan qolymyz bosamaı, voleıbol oınamaı qalsaq, sportzalǵa barǵymyz kelip turady. Qımyl-qozǵalysty, oıynnan alatyn áserdi adamnyń sanasy men denesiniń ózi qajet etedi. Keıde men issaparda bolyp, uzaq jol júrip, sportzalǵa sharshap kelemin. Al bir kishkene oınap, denemiz qyzǵan soń, sharshaǵanymyzdy umytyp ketemiz. Sergip, serpilip qalamyz.

Ásirese, jaýapkershiligi joǵary memlekettik qyzmette júrgen jáne basqa saladaǵy mımen kóbirek jumys isteıtin adamdar úshin sporttyń berer paıdasy óte mol. Kúni boıy ústelde otyryp jumys istegen adamnyń denesi jattyǵý jasamasa, taza aýada júrip-turmasa, jyl saıyn salmaq qosa beredi. As qorytý protsesi de buzylady. Tipti sportzalda jattyqqanda mıdyń sharshaǵany basylady. Jınalyp qalǵan túrli kerek emes oılardan, aqparattardan arylasyń. Tyń ıdeıalar paıda bolady.

– Áńgimeńizge raqmet.

Amandyq Batalov táýelsiz elimizge sińirgen eńbegi úshin birneshe ordenmen, medaldarmen marapattalǵan. 20 jyldan astam ýaqyt Almaty qalasy jáne Almaty oblysy voleıbol federatsııasynyń prezıdenti qyzmetin atqardy. «Qazaqstan Respýblıkasynyń qurmetti sport qaıratkeri» ataǵyna ıe boldy. Halyqaralyq aqparattandyrý akademııasynyń akademıgi. Qazir zeınetkerlik demalysta.

Eske sala keteıik, budan buryn voleıboldan ardager sportshylar arasynda halyqaralyq týrnır ótkenin jazǵan bolatynbyz.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT