Vedomstvoaralyq komıssııa oqytýdyń shtattyq formatyna oralýǵa ruqsat berdi

NUR-SULTAN. QazAqparat - Búgin Premer-Mınıstrdiń orynbasary Eraly Toǵjanovtyń tóraǵalyǵymen Qazaqstan aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń otyrysy ótti. QazAqparat bul týraly primeminister.kz saıtyna silteme jasap.

Densaýlyq saqtaý mınıstri Ajar Ǵınııat sońǵy aptada epıdemıologııalyq ahýal ortasha eseppen 5,6 ese nasharlaı túskenin atap ótti. Syrqattanýshylyqtyń ósýi Qaraǵandy oblysynda – 28 ese, Almaty oblysynda – 11 ese, Atyraý, Aqmola oblystarynda jáne Almaty qalasynda – 9-9,5 ese.

Vıtse-premer ınfektsııanyń taralýyn tejeý úshin azamattardy vaktsınalaý jáne reaktsınalaý qarqynyn kúsheıtýdi tapsyrdy.

Sondaı-aq vedomstvoaralyq komıssııa koronavırýs ınfektsııasyn emdeý úshin jańa dárilik preparattardy erekshe jaǵdaılarda paıdalanýdy qoldady.

VAK talqylaýynyń qorytyndysy boıynsha oqytýdyń shtattyq formatyna ruqsat berý usynyldy:

- mektepke deıingi uıymdarda – ata-analardyń ótinishteri boıynsha («qyzyl», «sary», «jasyl» aımaqtarda);

- oqýshy sany 600-ge deıin (qosa alǵanda) jalpy bilim beretin mektepterde;

- oqýshy sany 600-den asatyn jalpy bilim beretin mektepterde – jobalyq qýattyń 50% aspaıtyn júktememen;

- jalpy bilim beretin mektepterde – bastaýysh 1-4 synyptar (halyqaralyq mektepterde 5-6 synyptardy qosa alǵanda);

- mektepten tys uıymdarda – jeke sabaqtar, toptyq sabaqtar – 15 adamǵa deıin, múmkindigi shekteýli balalarǵa arnalǵan túzetý kabınetterinde (ortalyqtarynda), eresekterde – jeke jáne toptyq sabaqtar – 8 adamǵa deıin;

- kolledjder men joǵary oqý oryndarynda – aralas formatta: praktıkalyq, zerthanalyq, semınarlyq sabaqtar, óndiristik praktıka – ıkemdi grafık boıynsha shtattyq rejımde, dárister – onlaın.

Keńes barysynda atap ótilgendeı, orta bilim berý uıymdarynda, kolledjderde, joǵary oqý oryndarynda barlyq bilim alýshylardy qashyqtan oqytý formatyna aýystyrý karantın rejımin buzýshylyqtar anyqtalǵan kezde qoldanylatyn bolady.

Keńes sońynda Eraly Toǵjanov memlekettik organdar men ákimdikterdiń basshylaryna koronavırýs ınfektsııasynyń taralýyna jol bermeý boıynsha Úkimet qabyldap jatqan sharalardyń saqtalýyn baqylaýdy qamtamasyz etý jóninde naqty tapsyrmalar berdi.