Ýtıl alymnyń jańa mólsherlemeleri  jarııalandy
2022 jylǵy 5 mamyr 19:48

Ýtıl alymnyń jańa mólsherlemeleri jarııalandy

NUR-SULTAN. QazAqparat – «Ádilet» normatıvtik quqyqtyq aktileriniń aqparattyq-quqyqtyq júıesinde ýtıl alymnyń jańa mólsherlemeleri jarııalandy, dep habarlaıdy QazAqparat tilshisi.

3 mamyrda jarııalanǵan QR Ekologııa, geologııa jáne tabıǵı resýrstar mınıstriniń mindetin atqarýshynyń 2022 jylǵy 29 sáýirdegi № 138 buıryǵy boıynsha, tólenetin ýtıl alymnyń mólsheri kóliktiń qozǵaltqysh kólemi men salmaǵyna jáne sanatyna qaraı eseptelgen. Mysaly, gıbrıdti kúsh qondyrǵysy bar kólik quraldarynan basqa elektr qozǵaltqyshpen júretin kólikterdiń ýtıl alym mólsherlemesi mynadaı:

- qozǵaltqysh kólemi 1000 tekshe santımetrge deıingi kólikterdiń ýtıl alymy bazalyq mólsherlemeniń 1,5 koeffıtsentine,

- 1001- 2000 santımetr aralyǵyndaǵy kólikter úshin bazalyq mólsherlemeniń 3,5 koeffıtsentine,

- 2001-3000 tekshe santımetr aralyǵyndaǵy kólikter úshin bazalyq mólsherlemeniń 5 koeffıtsentine.

3001 tekshe santımetrden joǵary kólikter úshin bazalyq mólsherlemeniń 11,5 koeffıtsentine teńestirilgen.

Bul jerdegi bazalyq mólsherleme 50 aılyq eseptik kórsetkish dep bekitilgen.

Osyny eskersek atalmysh sanattaǵy kólikterdiń ýtıl alym mólsherlemesi aqshaǵa shaqqanda mynadaı bolady:

- qozǵaltqysh kólemi 1000 tekshe santımetrge deıingi kólikterdiń ýtıl alymy 229 725 teńge bolyp bektilip otyr. Buǵan deıin onyń mólsheri 459 450 teńge bolatyn.

- qozǵaltqysh kólemi 1001- 2000 tekshe santımetr kólikter úshin ýtıl alym mólsherlemesi 1 072 050 teńgeden 536 025 teńgege,

- 2001-3000 tekshe santımetr qozǵaltqyshty kólik úshin 1 531 500 teńgeden 765 750 teńgege,

3001 tekshe santımetrden asatyn qozǵaltqyshy bar kólik úshin 3 522 450 teńgeden 1 751 225 teńgege túsirilip otyr.

Buıryq mátininde budan basqa 4 sanattaǵy tehnıkalar boıynsha ýtıl alym mólsherlemesi kórsetilgen.

«Osy buıryq alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi», - dep jazylǵan buıryq jobasynda. ıAǵnı, qujat 14 mamyrda kúshine enýi kerek.

Buǵan deıin jeńildetilgen avtonesıe kelesi aptadan bastap berilýi múmkin ekenin jazǵan bolatynbyz.


Seriktester jańalyqtary

Jańalyqtar

Úrdis

MURAǴAT