Úrker aýylynyń turǵyndaryn ne alańdatyp otyr: Elorda ákimi jergilikti halyqpen kezdesti
ASTANA. QazAqparat - Elorda ákim Jeńis Qasymbekov búgin elorda mańyndaǵy Úrker eldi mekeniniń turǵyndarymen kezdesip, olardy tolǵandyryp otyrǵan máseleler týraly tildesti. Ol týraly qala basshysy óziniń Facebook áleýmettik jelisindegi paraqshasynda jarııalady, dep habarlaıdy QazAqparat.
«Úrker eldi mekeniniń turǵyndarymen kezdestim. Olar ınjenerlik, elektrmen jabdyqtaý jelilerin jóndeý, áleýmettik nysandar, aıaldamalar, jol salý, abattandyrý, kógaldandyrý sııaqty ózge de birqatar. máselelerdi kóterdi. Eldi mekendi damytýdyń jalpy josparyn quramyz, eń aldymen sheshilýi tıis mindetterdi jáne ekinshi kezeńde qolǵa alý qajet máselelerdi anyqtaımyz»,-dedi shahar basshysy.
Birinshi kezektegi mindet - Úrker eldi mekeninde káriz jáne elektrmen jabdyqtaý jelileri problemasyn sheshý. Biz muny birinshi kezekte oryndaımyz. Sol sııaqty birqatar áleýmettik nysannyń qurylysyn júrgizip jatyrmyz. Máselen merdigerlerge bıyl dene shynyqtyrý-saýyqtyrý kesheni men órt sóndirý deposynyń qurylysyn aıaqtaý mindeti tapsyryldy.
Sondaı-aq osy eldi mekende eki mektep (2024 jyly jáne 2025 jyly paıdalanýǵa beriledi) salamyz. Qalada kelesi oqý jylyna 13 mektep salýdy josparlap otyrmyz. Memleket basshysynyń tapsyrmasy boıynsha «Jaıly mektep» ulttyq jobasy aıasynda 100 myń oqýshy ornyna arnalǵan 25 mektep (2 aýysymdy) salamyz. Olardyń qurylysyn bıyldan bastaımyz.
«Astanada 16 eldi meken bar. Elordanyń árbir tórtinshi turǵyny eldi mekende turady. Árbir eldi mekenniń turǵyndarymen jeke kezdesemin. Aýdandar men eldi mekenderdi damytý josparyn birlesip anyqtaımyz»,-dedi Jeńis Qasymbek.
Jańalyqtar
