Ýnıversıtet bitirgen túlekterge eńbek naryǵynda suranys joq - Senat
2022 jylǵy 20 mamyr 11:15

Ýnıversıtet bitirgen túlekterge eńbek naryǵynda suranys joq - Senat

NUR-SULTAN. QazAqparat – Joǵary bilim týraly dıplomy bar qazaqstandyq jastardyń 40%-dan astamy mamandyǵy boıynsha jumys istemeıdi. Bul týraly Senat tóraǵasy Máýlen Áshimbaev málim etti, dep habarlaıdy QazAqparat tilshisi.

«Joǵary bilimniń deńgeıi men oǵan degen suranysqa qatysty máseleler de az emes. 2021 jyly qazaqstandyq joǵary oqý oryndaryn bitirgen túlekterdiń úshten biri eńbek naryǵynda suranysqa ıe bolmaǵan. Soǵan qaramastan, ekonomıkanyń birqatar salasynda tehnıkalyq mamandar men bilikti jumysshylar jetispeı jatyr», - dedi M. Áshimbaev Senattaǵy «Jańa Qazaqstan: jastar jáne jańǵyrý» taqyrybyndaǵy parlamenttik tyńdaý kezinde.

Senat tóraǵasy atap ótkendeı, jastardyń taǵy bir basty máselesi – jumyssyzdyq bolyp otyr. Jastar arasyndaǵy jumyssyzdyqtyń resmı deńgeıi salystyrmaly túrde tómen, biraq táýelsiz uıymdardyń balama zertteýleri basqa málimetterdi kórsetedi.

«Táýelsiz uıymdardyń saýalnamalaryna sáıkes, 25-29 jas aralyǵyndaǵy topta respondentterdiń shamamen 12%-y áli turaqty jumys istemegen. Joǵary bilim týraly dıplomy bar qazaqstandyq jastardyń 40%-dan astamy mamandyǵy boıynsha jumys istemeıdi. Osyǵan baılanysty jumys oryndaryn qurýǵa jáne jastar praktıkasyna baǵyttalatyn bıýdjet qarajatyn paıdalanýdyń tıimdiligine qatysty máseleler týyndaıdy», - dedi Máýlen Áshimbaev.

Budan buryn habarlanǵandaı, M.Áshimbaev barlyq reformanyń túpki maqsaty jastardyń ál-aýqatyn arttyrýǵa ári olardyń damýyna jaǵdaı jasaýǵa arnalǵanyn atap ótti.



Uqsas jańalyqtar
Avtor:
Tilshi

Jańalyqtar

MURAǴAT