Ulytaýlyqtardyń ál-aýqaty jaqsara túsedi - Prezıdent
2022 jylǵy 16 maýsym 15:12

Ulytaýlyqtardyń ál-aýqaty jaqsara túsedi - Prezıdent

ULYTAÝ. QazAqparat – Derbes oblys mártebesi Úlytaý aımaǵyn tyń serpinmen damytýǵa múmkindik beredi. QR Prezıdenti Qasym-Jomart Toqaev Ulytaýda bastalǵan Ulttyq quryltaıdyń alǵashqy otyrysynda osyndaı oı aıtty, dep habarlaıdy QazAqparat tilshisi.

«Meniń Jarlyǵymmen bul óńirde jańa oblys qurylǵanyn bilesizder. Qasıetti ólkeniń ataýyn jańǵyrtyp, ony Ulytaý dep atadyq. Derbes oblys mártebesi osy aımaqty tyń serpinmen damytýǵa múmkindik beredi. Jumys oryndary ashylyp, halyqtyń ál-aýqaty jaqsara túsedi dep oılaımyn. Jańa nysandar, solardyń ishinde áleýmettik keshender boı kóteredi, týrıstik áleýeti artady», - dedi Qasym-Jomart Toqaev.

Memleket basyshsynyń aıtýynsha, atalmysh óńirdiń alǵashqy qadamy alqaly jıynnan bastalǵanyn atap ótti.

«Oblystyń alǵashqy qadamy alqaly jıynnan bastalýda. Ult uıasy – Ulytaýdyń ǵasyrlar boıǵy uly mıssııasy qaıta jalǵasyn tapty», - dedi Prezıdent.

Aıta keteıik, Prezıdent Ulytaý oblysyndaǵy jumys sapary aıasynda Ulttyq quryltaıdyń alǵashqy otyrysyna qatysyp jatyr.

Keshe Memleket basshysynyń Ulttyq quryltaı qurý týraly Jarlyǵy jarııalandy.

Ulttyq quryltaıdyń qazirgi quramynda Májilis depýtattary men QHA múshelerinen, azamattyq qoǵam men saıası partııa ókilderinen, sarapshylar men óńirlerdegi qoǵamdyq keńes múshelerinen, kásipkerlerden jasaqtalǵan 117 adam bar.

Solardyń bir parasyn atasaq, aqyn Muhtar Shahanov, qazaqtyń tuńǵysh ǵaryshkeri Toqtar Áýbákirov, akademık Asqar Jumadildaev, ekonomıst Jaqsybek Kúlekeev, saıasatker Álıhan Báımenov, jýrnalıst, medıa-menedjer, qoǵam qaıratkeri Ermurat Bápı, Parlamenttiń birneshe shaqyrylymynyń depýtaty Nurtaı Sabılıanov, balýan Dáýlet Turlyhanov, ǵalym-bıotehnolog Kúnsulý Zakarııa, dintanýshy Qaırat Joldybaı, ǵalym Anar Fazyljanova sııaqty esimder bar.

Memlekettik keńesshi Erlan Qarınniń jazbasyna súıensek, keleshekte quryltaı jumysyna qatysýshylar aýystyrylyp otyrýy múmkin.


Seriktester jańalyqtary

Jańalyqtar

Úrdis

MURAǴAT