Uly Jibek jolyndaǵy transshekaralyq baǵdar – áleýetti baǵyttyń biri - Dáýren Abaev
2022 jylǵy 19 mamyr 16:38

Uly Jibek jolyndaǵy transshekaralyq baǵdar – áleýetti baǵyttyń biri - Dáýren Abaev

TAShKENT. QazAqparat – Uly Jibek jolynyń transshekaralyq týrıstik baǵdaryn ilgeriletý – yntymaqtastyqtaǵy áleýetti baǵyttardyń biri. Bul týraly Tashkentte ótken ShYU-ǵa múshe memleketterdiń týrıstik ákimshilikteri basshylarynyń kezdesýinde QR Mádenıet jáne sport mınıstri Dáýren Abaev málimdedi, dep habarlaıdy QazAqparat menshikti tilshisi.

«Uly Jibek jolynyń týrıstik baǵdaryn ilgeriletý – áleýetti baǵyttardyń biri. Aqtaýdaǵy teńiz-saýda porty jaǵjaılarymen, qonaq úıleri, ınfraqurylymy, qolaıly klımaty jáne mańaıyndaǵy ǵajaıyp mádenı eskertkishterimen ShYU elderi úshin tolyqqandy demalys ortalyǵyna aınala alady», - dep atap ótti Dáýren Abaev Ózbekstan astanasynda ótken «ShYU elderi yntymaqtastyǵynyń jańa kezeńi: týrızm jáne mádenı mura» halyqaralyq forýmynda.

Mınıstr tabıǵatynyń alýan túrliligi men geografııalyq ornalasýyna baılanysty Qazaqstan transshekaralyq týrızmniń birneshe nusqasyn usyna alatynyn atap ótti. Máselen, Tıan-Shan men Altaı taýlarynda taý týrızmin, al Kaspıı teńizinde krýız, sondaı-aq Uly Jibek joly bóliginde tarıhı saıahat túrlerin uıymdastyrýǵa múmkindik bar.

«Buǵan deıin jyl saıyn 7 mıllıonǵa jýyq qazaqstandyq ShYU elderine barsa, Uıymǵa qatysýshy memleketterdiń shamamen 8 mıllıondaı azamaty Qazaqstanǵa keletin. 2021 jyly bul kórsetkish 3 mln-ǵa da jetken joq», - dedi týrızmniń pandemııa kezinde aıtarlyqtaı zardap shekkenine toqtalyp ótken mınıstr.

Vedomstvo basshysy Qazaqstan shekarasyndaǵy karantındik shekteýler kezeń-kezeńimen alynyp jatqanyn málim etti. Jaıaý júretin baǵyttar, avtobýs, temirjol jáne áýe qatynasy qalpyna keltirile bastaǵanyn aıtty. Sondaı-aq, salanyń daǵdarystan tezirek shyǵýy úshin Qazaqstanda qabyldanyp jatqan memlekettik qoldaý sharalarynan habardar etti.

«Úkimet taý-shańǵy kýrorttaryna arnalǵan jabdyqtardy jáne týravtobýstardy satyp alýǵa 25%-ǵa deıin, týrıstik obektiler men jol boıyndaǵy servıs obektileri ókilderine 10%-ǵa deıin ótemaqy tóleıdi. Sonymen birge, sanıtarlyq-gıgıenalyq núkteler men balalardyń avıabıletteri sýbsıdııalanady», - dedi Dáýren Abaev.

Aıta keteıik, Forýmǵa ShYU-ǵa múshe – Indııa, Qazaqstan, Qytaı, Qyrǵyzstan, Pákistan, Reseı, Tájikstan, Ózbekstan memleketteri týrıstik ákimshilikteriniń basshylary, sondaı-aq týrızm salasyn damytý men mádenı muralardy saqtaý jónindegi halyqaralyq sarapshylar qatysty.

Kezdesý qorytyndysynda «Shanhaı yntymaqtastyǵy uıymyna múshe memleketterdiń úkimetteri arasyndaǵy týrızm salasyn damytý týraly áriptestik kelisimi» maquldandy.


Uqsas jańalyqtar

Jańalyqtar

MURAǴAT