Ulttyq joba: Qazaqstandyq kásipkerler shetelde taǵylymdamadan ótedi
2021 jylǵy 5 qarasha 23:45

Ulttyq joba: Qazaqstandyq kásipkerler shetelde taǵylymdamadan ótedi

NUR-SULTAN. QazAqparat – Kásipkerlerdi qoldaýǵa arnalǵan ulttyq joba aıasynda otandyq kásipkerlerdiń shetelden taǵylymdaman ótýi josparlanýda. Bul týraly QR Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

Bıyl elimizde qolǵa alynǵan 10 ulttyq jobanyń biri «Ornyqty ekonomıkalyq ósý, óńirler men bıznesti damytý» dep atalady.

«Ulttyq joba aıasynda kásipkerlik belsendilikti arttyrý baǵytyn birqatar ózgerister kútip tur. Qazaqstandyqtar óz isin ashýy úshin qolaıly jaǵdaı jasalady. Onyń qatarynda «Bıznes bastaý» baǵdarlamasy da bar. Sonymen qatar túlekterge arnalǵan jastar praktıkasy, osal top sanatyna jatatyn jandarǵa arnalǵan áleýmettik jumys oryndary jáne zeınet jasyna taqaǵan adamdardyń eńbekpen qamtý maqsatynda «Kúmis jas» jobasy qolǵa alynbaq. Odan bólek, elimizde iskerlik kásipkerlikti ilgeriletý úshin kásipkerlerdi shetelde bıznes boıynsha taǵylymdamadan ótkizý qarastyrylǵan», - dedi Áset Erǵalıev OKQ-de ótken baspasóz máslıhatynda.

Onyń aıtýynsha, atalǵan sharalardyń júzege asýy nátıjesinde óz kásibin dóńgeletetin otandastarymyzdyń úlesi 1,7 esege artpaq.

«Jáne de kásipkerlikti damytýdyń arqasynda jańa jumys oryndarynyń sany 1,4 esege ósip, 50-den 70 paıyzǵa arta túsedi. Sol sııaqty qarjylaı emes qoldaý alatyn kásipkerlik sýbektilerdiń sany 638 myńǵa jetedi. Qysqa merzimde kásibı bilim alyp, jumyspen qamtylatyndardyń úlesi 55-ten 80 paıyzǵa kóbeıedi», - deıdi ol.

Buǵan deıin mınıstr ulttyq jobalardyń oryndalý barysy arnaıy aqparattyq júıe arqyly qadaǵalanatynyn aıtty.

Sondaı-aq, Áset Erǵalıev elimizde elektrondy temekini satýǵa tyıym salýǵa qatysty pikir bildirdi.

Jańalyqtar

MURAǴAT