Ulttyq sport túrlerinen «Qyzyljar-2022» festıvali ótti
2022 jylǵy 27 maýsym 23:07

Ulttyq sport túrlerinen «Qyzyljar-2022» festıvali ótti

PETROPAVL. QazAqparat – Soltústik Qazaqstan oblysynda ulttyq sport túrlerinen «Qyzyljar-2022» festıvali ótti. Óńirlik jarysqa 700-den astam sportshy qatysty, dep habarlaıdy QazAqparat tilshisi.

SQO dene shynyqtyrý jáne sport basqarmasynyń málimetinshe, oblystyq festıval bıyl Shal aqyn aýdany Sergeevka qalasynda ótti.

Іs-sharany uıymdastyrýshylar ulttyq sport merekesin áserli, este qalarlyqtaı ótkizýge tyrysqan. Úsh kúnge shaqtalǵan oblystyq festıvalge 13 aýdannan 700-den astam sportshy qatysty. Olar qazaq kúresi, asyq atý, toǵyzqumalaq, aýdaryspaq, teńge alý, jekpe-jek sekildi sporttyń 12 túrinen saıysty. Jarys 26 maýsym kúni kókpar oıyndary men túrli qashyqtyqtaǵy at jarysymen aıaqtaldy.


Kókpardan Aqjar aýdanynyń sportshylary kósh bastap, fınaldyq oıynda Taıynsha aýdanynyń komandasyn jeńdi. Qola medal osy joly jambyldyqtarda. Teńge alý boıynsha qyzyljarlyqtar kósh bastady, olar komandalyq esepte jarys túrlerinen jáne armerestlıngten birinshi oryn aldy.

Qazaq kúresinen shalaqyndyq balýandarǵa shydas berer eshkim bolmady. Olar sondaı-aq toǵyzqumalaq, jekpe-jek jáne bes tasta komandamen «altyn» jeńip aldy.

Túıepalýandardyń saıysynda Ýálıhanov aýdanynyń komandasy altynnan alqa taqty. Aýdaryspaq boıynsha Aqqaıyń aýdanynyń sportshylary, asyq atýdan jambyldyqtar jeńiske jetti.

Al barlyq saıystyń qorytyndysy boıynsha Shal aqyn aýdanynyń komandasy «Qyzyljar-2022» ulttyq sport túrleri festıvaliniń chempıony atandy. Ekinshi oryndy aqjarlyqtar, úshinshi oryndy Qyzyljar aýdany ıelendi.

Dástúrli festıval kelesi jyly Qyzyljar aýdanynda ótpek.



Uqsas jańalyqtar
Seriktester jańalyqtary

Jańalyqtar

Úrdis

MURAǴAT