Ulttyq bank zeınetaqy jınaǵyn sheteldik uıymdardyń basqarýyna berýdi usyndy
ASTANA. QazAqparat –QR Ulttyq banki tóraǵasynyń orynbasary Álııa Moldabekova zeınetaqy aktıvteriniń bir bóligin jeke basqarýǵa berý kezinde qandaı ózgerister bolýy múmkin ekenin aıtty, dep habarlaıdy QazAqparat tilshisi.
«Ulttyq bank QR Qarjy naryǵyn retteý jáne damytý agenttigimen, Eńbek jáne halyqty áleýmettik qorǵaý mınıstrligimen birlesip, Memleket basshysynyń Jarlyǵymen bekitilgen jalpyulttyq is-sharalar josparyn iske asyrý boıynsha jumys júrgizdi. Bul rette zeınetaqy aktıvterin basqarýǵa jeke basqarýshy kompanııalardy tartý múmkindigin qarastyratyn BJZQ-nyń tıimdi ınvestıtsııalyq strategııasyn ázirleýdi kózdeıdi. Osy oraıda birlese daıarlanǵan usynystarǵa toqtalsaq, BJZQ salymshylaryna ózderiniń qalaýy boıynsha jınaqtalǵan zeınetaqy qarajatynyń 50%-ǵa deıingi bóligin jeke basqarýǵa aýdarý quqyǵyn berý eskerilgen», - dedi Á. Moldabekova Senatta depýtattarmen kezdesý kezinde.
Sonymen qatar ol jeke basqarýshy kompanııalardyń ınvestıtsııalyq múmkindikterin keńeıtý múmkindigi qarastyrlyp otyrǵanyn aıtty.
«Zeınetaqy aktıvteri turǵysynda tabystylyqty qamtamasyz etý úshin jeke basqarýshy kompanııalarǵa qoıylatyn talaptardy jaqsartý boıynsha shara qabyldaý kerek. Budan bólek, jekemenshik basqarýshy kompanııalardy zeınetaqy aktıvterin basqarýǵa jiberý krıterıılerin keńeıtý qajet. Onyń ishinde zeınetaqy aktıvterin basqarýǵa kredıttik reıtıngi joǵary sheteldik enshiles uıymdardy tartý múmkindigin qarastyrý usynyldy», - dedi UB ókili.
Budan buryn habarlanǵandaı, bıyl 7 aqpan kúni Senatta Áleýmettik kodekstiń jobasyn tanystyrý kezinde QR Eńbek jáne halyqty áleýmettik qorǵaý mınıstri Tamara Dúısenova zeınetaqy júıesi salasyndaǵy ózgerister týraly aıtty.
Salymshylar bar zeınetaqy jınaqtarynyń 50 paıyzdan aspaıtyn bóligin aktıvterdi basqarý jónindegi kompanııaǵa berýge jáne mundaı kompanııany ózderi tańdaýǵa quqyly bolady. Bul rette zeınetaqy jınaqtarynyń saqtalýyna memlekettik kepildik tek Ulttyq bank basqaratyn jınaq bóligine ǵana beriledi.
«Al jeke basqarýǵa berilgen zeınetaqy jınaqtarynyń saqtalýyna jáne onyń tabystylyǵyna salymshy tańdap alǵan kompanııa jaýapty bolady. Sondyqtan árbir salymshy basqarý jónindegi jeke kompanııany tańdaǵan kezde yqtımal táýekelderdi eskerýge tıis», - dedi mınıstr.
